Bunna man a Godfather fi him owna pickney.
Woooooiiiiiieeeee!!! Waaa gwaan TamFam?? Big up unu good-good self. Mi deh ya trang an hawty. Propa spek to all Tambourine Radio and Ragashanti Live listeners. Bless up unu self. Mi say mix-up a blaze up ya inna Obama Lan. A bare tings! Mek a jus bax unu wid one right ya now.
Cold Bunna man!
Soh dis bredda own a restaurant up ya. Him have a babymada, an dem have two yute. Bossy den goh step to him babymada sista an she nuh do nuttin more dan goh dash out to him. Yeah, Bossy staat rinse out him babymada sista! But hear ya now ... an mek sure unu tek unu time an carefully falla di mix-up ... bossy is also good friends wid him baby mada sista husband! Yups, bossy spen nuff time a par wid him fren, an di fren nuh know him a sawka-sawka him wife.
Eventually bossy lef him babymada an staat shell out di babymada sista even more. Bossy den bring een him babymada sista (wife of him fren) an mek she staat run di restaurant an control di money and everything.
Wen di babymada sista a goh di restaurant fi work she park waaaaaaaaaaaayyyy dung di road and walk waaaaaaaaaayyyyyy up di road to di restaurant, caa she nuh waan nobaddy see har vehicle near di restaurant. An wen she inna di restaurant a crazy sort out she an bossy a blaze inna dem office.
Mi say it reach di point where wen bossy babymada sista husban come a di restaurant an naa get good service or dem a tek long wid him food, him staat cuss di workers dem an a tell dem say Bossy a him good fren fi years an him a goh mek a report to him an get people fired roun ere!! Lol. Den ppl, unu nuh know say everytime him inna di restaurant a run off him mout pon di workers dem, him wife inna di office a watch him pon di camera, an of course, him nuh know!! An more while wen him deh in deh a cuss di workers, him wife inna di office unda some propa treatment fram him fren! Di wife all a watch him pon di camera an har mout full wid di swiping!!! DWL!!!
Yuh know say mi need a goodas fi come gi mi CPR pon da one ya!! Nooo sah!!
Anyways, yuh have a nex paat to di mix-up. Bossy a sort out di wife of one more a him fren, an en up a breed har!! Yeah! Bossy an him oda fren wife jus decide fi fling di jacket pon di fren. Di poor fren nuh have a clue waa gwaan an jus happily own up di pickney as fi him. An him fren rate him soh much dat di fren ask him fi be di godfather. Bossy accept an now him is officially di godfather fi him owna pickney.
Anyways, one day him fren deh a di restaurant an a talk bout how much him love him son an dat him son a di dead stamp a him grandfather (di fren father). Yuh waan hear how bossy de deh a agree wid him an a chat bout "a true man, him a di dead stamp a him grandfather fi real." Aaaayyy sah.
Jah know star, Bossy a real coot enoh, di dawg a goh haad a shell out him sista-in-law an den goh breed him fren woman, an still a di man fren as di pickney godfather. Crazy!! Jus goes to show say yuh have some cold an vicious ppl out deh.
Awright, mi a leggo ya now. Unu sen mi unu mix-up dem at firstname.lastname@example.org. See unu nex week Thursday same place yah soh. Bless up unu self. Road!!