Mix-up pon di cruise
Mi deh yah pon di big bad Love and Harmony Cruise. Work mi a work a host di shows and party dem wid Beres Hammond, Shabba Ranks, Dexta Daps, Konshens, LUST, I-Wayne, Queen Ifrica, an a whole host a other entertainers. Di cruise noice yuh bawl!
Soh mi deh inna one a di dining hall dem a eat some food and hear some woman a big roun table back a mi a chat.
Mi neva a pay dem nuh mind until mi notice dem conversation get juicy wid mix-up. Den yes, mi staat neatly kack mi aise an staat faas inna dem bizniz, (who nuh like it unu lowe mi, caa a dem inna big, big dining hall a chat dem biz niz loud. LOL).
Soh anyways, one a di woman mussy did tell har husband say she a goh spen some time wid one a har bes fren weh did jus have surgery fi cancer.
Di length of time was from Sunday, February 26 to Friday March 3 - which just happen fi coincide wid the dates of the cruise which is from February 27 to March 3.
Di wife fren did have cancer surgery fi true, but she neva tell har husband seh she, di fren weh have di cancer, an two more a dem fren did a goh pon di cruise.
An she certainly neva tell him seh she an har fren dem did a bring four bunnaman pon di cruise too.
Somehow di husband find out bout him wife ginalship an neatly goh buy a cabin too fi di cruise.
Afta di ship sail weh out Miami di husband jus roll up pon him wife an har fren dem an seh him come fi surprise har!
Di wife obviously did shock. Of course a foolishniss di husband a chat, cause all him really a do a watch out him wife good-good.
Di present result is dat di husband an di wife a stay togeda inna di same cabin, an she cyaan get fi link wid di bunnaman.
Also, di wife waan cuss out di husband fi a watch har an a sneak roun an trail har come pon di ship.
But har fren dem a beg nuh fi dweet caa dem a worry say if di wife start a war wid him, den him might end up a goh tell di oda three fren dem husband wa really a gwaan.
So a soh mi hear dem a beg out di ting.
A tousands people deh ya pon ship, sph mi nuh know if mi a goh get fi faas some more pon dem. But I'll be looking!!! Dwl.
Awright, leggomentz again. Sen mi unu drama dem at email@example.com. See unu nex Thursday same place ya soh. Bless up unu self.