People, people, people, how unnu do? Me? Me alright still, ah mean tings can always better, but unnu know how it guh! Mi seh last week mi mash some of dem corn, mi apparently get a few of dem heated! Mi nuh know a wah do dem - dem need fi low Miss Cherry mek she gwaan do har ting yah!
Anyway is pure tings, pure passa passa pon di road, suh mek we go inna it nuh.
SIR COXSONE
IMAGINE HOW DEM just name road after Sir Coxsone for all his contribution to di music and di upliftment of di country and him just dead! Bwoy what a ting. Some bad mind people a come run off dem mout bout ah dat kill him - unnu too disgusting. Di man was 72, him bat long. Respect to fadda Dodd and him family.
But people, a whe dat deh fineral a guh keep? Mus Arena, yuh know how much people waan go? Mercy king, dat a guh be one piece of someting.
WHAT IS WRONG WID SOME OF UNNU?
MI HEAR BOUT di behaviour and me still shocked. How some of unnu nasty girl must go to the man funeral and bad up him wife? Unnu did a sleep wid di married man, and unnu nuh have no shame and now him dead, unnu going to bad up di wife?
Well in case unnu nuh know nutting bout di law of the land, she is the person who going to get everything! So scubbay, guway!
L.A. LEWIS
STRIKES AGAIN
NOW UNNU KNOW seh unnu cyaan go no whe, not even farin and nuh see 'We love you deejay L.A Lewis'.
Well people L.A Lewis write up reach down a Gleaner Company. Yes. Inna di female bathroom, pon di ground floor right above di mirror is sticker bout L.A. Lewis tune wid Michael Jackson! Somebody cannot talk to him and tell him fi stop it. If promotion was enough to build a career, him would be the world's greatest deejay. But he is not, that is all I will say.
ME SUPPORT DAT
KIM, FROM DI Kim show, me agree wid yuh bout dis early locking down of dance. Dem need fi address di issue properly and fairly. And me notice seh from it name Vintage it can go on till 6:00 a.m, nobody nuh business but from is a dancehall ting it get a fight!
SPEAKING OF
GETTING A FIGHT!
Me feel it fi Firelinks, soon di man cannot eat a food because every where him go is like dem a block him, dat nuh right. Everybody fi get a chance fi live, everybody need fi get a chance fi survive.
Anyway mi gone yah NEXT WEEK.
