One Third

Rising Stars Suss ... Rising Stars Suss

Forgive dem Father 'cause they know not what dem do! Me have manners, so mek me just tell uno 'howdie', 'wha ah gwaan', but me haffi get inna di suss right about now, because di perturbiculation a kill me...

Wha Dat Brushy?

Brushy One String - winston sill photos

Ah wha dat me see Brushy One String run pon stage innah? A did wha woman wig? Mind people start mistake you as some kinda clown uno. Me a say 'ah wha dis man?' Wha me fi expect next week, Brushy featuring, the Incredible Granny? You need fi stop di foolishness man and just mek people see you as a good artiste, nuh dat's why yuh come pon di show?

Brushy, me have a next question, it seem like say yuh enemy list start full up. Mi deh a Friday show and some people a say yuh fi go home cause yuh neva do good the week before. One man all a say a 'science' yuh a wuk pon di people dem fi vote fi yuh. Lawd what a stress innah me lef breast!

But differently still, me have a nedder question, if Brushy come back pon Rising Stars ah sing Boom Bang Beng, dat mean say if years from now Bounty Killa pop dung, we can expect fi see him pon di show a try revamp Eagle and Hawk?

Bad Min' Is Active

People, mi say, di bad mind attack did innah full force pon Friday night. One girl wha innah di audience a say she woulddah look betta innah di skirt wha Denise did have on cause she have more body dan Den-Den. Wha mek some people tan so? Nuh watch no face yaw, just tell gal say 'mi back, mi back, mi back!' Besides, if a so she did wha di frock she can go buy di XL ah di store if she can afford it.

Nickiesha or Mary?

Nickiesha Barnes

Mi read something innah di STAR whe people a say Nickiesha a di Jamaican Mary J. Blige and me did haffi tink bout dat likkle. She have a long way fi go fi reach Mary status, but trust me she a gwaan. A long time Jamaica need wha female singer wid a strong voice uno, one who sing wid nuff feelings too. Trust me yuh a gwaan...when you when deh sing di song dem, me feel like me an mi hussi lef. Dat's a gift my girl. Do yuh ting! By di way, yuh son cute eeh...

Too Little Too Late?

Suzanne Perkins

Suzanne, mi fren, yuh did gwaan good pon Sunday too, but mi nuh know how tonight a go gwaan. Mi feel say yuh put on di track shoes too late babes. Sorry. But do yuh ting. If anything, you and Natel can rip it up and mash it up again wid Changa Changa next year.

People mi gone yah man, mi head a hurt me from dem people yah; dem excitement too much fi me. Next week...