From Left: Bounty Killer,Jah Cure, Patrick Roberts, Ricardo Fuller, Carol Gonzales

Ah me say Sharlene Suss to the world, yu nuh! Wha do some gyal? Dem a fight over man and the man no waan dem. Mi nah play wid dem this week. Mi come fi talk de tings dem. God over evil, we say. Nikki Z, yuh large, love di love wey yuh gi mi since week.

KILLER NUH CHANGE

Tell yu say Killer ah the real big man inna the business. Mi hear say the Warlord rediscover him writing skills and him de inna the lab ah write crazy tune fi Sting this year. Yu ah go see the real ole-time Warlord ah Sting 2007 and mi hear say him plan fi dun Kartel and the Empire over deh and Kartel nah tek no talk from no man, so the ting ah get intense.

JAH 'CURE' BAHAMAS

How Jah Cure a guh suh hard? Mi ah watch the footage of the Millennium Countdown show on RE TV and the ting sell off, thousands of people turn out and ah hold a joy wid the big man. The girls dem nuh stop scream fi him. It look like him plan fi 'cure' di world. If him get di chance dat is. Nuh visa nuh run yet.

RING DING DING AND BUSS

Baby Chris mash up Caymanas alongside Rebel, Tarrus Riley and Richie Spice last week. Richie Spice ah the real big man inna the business, but mi haffi gi de props to Baby Chris, the young people dem love him, when him say Ring Ding Ring Ding Ding Dah, the place just get mad.

WHO HAVE HOSPITAL BILL A FOREIGN

Wha do some ah dem gal ya? Dem run gone a foreign fi have baby inna expensive U.S. hospital and nuh know the consequences? Portmore, Uncle Sam ah pree dem because when dem go inna the hospital and get some big US$9,000 bill, dem head start hot dem, and when dem run gone a Jamaica and tink say everything alright, dem get a shock because Uncle Sam send the bill go immigration and as dem come back inna dem country, it show up pon the system. But the question everybody ah ask is: how some dem so hype and dem run up big bill ah U.S. hospital and nuh waan pay it?

HOT RIDDIMS FI THE XMAS

Right now, the 83 riddim from Flava ah tek the place wid the Queen Ifrica Daddy song, the ting sell off. Look out for Delly Ranks new ting, Shoota weh have the Munga and Chino diss song dem. Bwoy, mi caan believe say Munga ah call Stephen, Steve Urkle, but Chino ah go hard too. The man really ah improve. Stephen have a new ting weh sell off too. It have a Kartel tune weh a say, 'nobody caan mek me run outta my place". Who him a talk? Mofraudo?

CRAMP DEM AH MAD DEM

How some gal say dem hot and dem nah fly? Keisha Cramp Dem to the world. Mi hear say yu fly out fi go watch Jah Cure inna Bahamas and yu plan fi stay a couple more weeks a tek in the sights. How yu one so hype? That's why yu enemy dem hate yu. Poochie nah fly. Spice girls dem nah fly. Star girls dem park over 6 North. Mitzy Flava dem hardly lef' Portmore unless dem a buy hair downtown. A wah do dem? Even though dem a chat say ah small foreign yu gone, nuh watch that. Cramp Dem to the world. A dat we say. Keisha, yuh too visa!

DASECA HOT IN THE STREETS

Right now, people ah say Daseca ah lead inna the streets. Ah dem come buss Bugle wid the big song, What Am I Gonna Do? and now mi hear say Serani and Bugle have a song together weh the whole ah Jamaica ah endorse. Daseca to the world. A dat mi sey Portmore love yuh ting.

JUDGE HOLDS COURT AT CHRISTOPHER'S

The judge, Carol Gonzalez, has a growing fan base, she took the stage at Christopher's in The Quad nightclub in New Kingston the other day, and her Hotel California song sell off. The soprano voice ah mad dem and why dem nuh stop talk say yu doan have no hit. Memba say a yu did sing with Buju Banton on the Second Class Citizen song? Weh dem feel like?

FULLER BACK IN THE ISLAND

The big baller from England, Ricardo Fuller, is back in the place, and the people dem a look forward to the match dem Sunday and Wednesday. Him long-time girl Danielle supposed to well happy again. She ah work hard pon her career, and now she can watch Jamaica number 10, the number one man inna her heart, ah play ball. Her glad bag mus' buss now.

QUESTION TIME

❒ Why Delly record Munga and him and Big Ship a friend? That's why Chino ah pree him.

❒ Why Buju caan get the plastic surgery fi her face?

❒ Why Kip Rich and Blacker never get reinvite to the RE high school tour?

❒ When dem ah go shoot video for Lion Cub new tune, Across the Ocean?

❒ Why Angel doan allow Beenie Man to see his child?

❒ Why Gyptian tour cancel in Europe?

❒ How the Braeton yute dem nah give up despite the fight dem a get? Dem plan fi keep an event fi unite the people and build back the vibes, stay tuned fi more.

❒ How Deva ah link with Skatta Burrell now?

❒ Where is Wayne Marshall? Him and Tami Chynn still deh?

❒ Can you believe, me ah pass Shocking Vibes studio the other day and see Nuffy ah shoot video fi him new project, North Coast, wid Patrick Roberts inna it? But mi a wonder how yu manage get Patrick Roberts fi come inna the video? Ah history, 20 plus years inna the business and never come inna video yet, and now all of a sudden, Patrick just free up. Nuffy, yu mek history.

BIG UPS

Big up Flex, mi see say yu a work hard pon the career. Big up Nikki Z, mi hear 'bout the charity donation yu a do fi the yutes dem of Jamaica, we love the toy drive weh yu deh pon. A suh mi know Portmore a guh support yuh ting a Sugarman Beach Novermber 24, it a guh maaaad! Big up Butterfli Wings who ah giveaway toys and school supplies at the Burnt Savannah Sports Complex inna St. Bess on December 17. Deva Brat and Twins of Twins ah perform. big up Dozer who have three gal inna him hotel room inna Bahamas over the weekend. Him ah the real man.

Email: Sharlenesussu@gmail.com