( L - R ) D'Angel, Beenie Man - File photos

Some gal ah live inna one illusion. Dem feel say dem de pon tap and dem just nah happen. No long ting this week. Ready fi me done dem, Portmore? For sure.

... DI CONTINUATION

How yuh naw talk 'bout who tek care a yuh and neva lef yuh side when yuh look like zombie after yuh pickney dead? And people, if uno think ah lie, him eva have a show yet? How yuh naw talk 'bout di pickney wha one gyal a country say she have fi yuh an yuh disown? How yuh naw talk 'bout all di time dem when yuh a send message through people to mi hot friend Cherry 'bout nuh write 'bout yuh an mek she haffi dutty yuh up likkle more? But of course it is! Quite so! Ah coulddah wha mek some man come een like dem whaa come run nobaddy dung a STAR? But dem need fi know dem nuh run nobaddy round yah, and dem certainly naw run Sharlene! Go find one song and stop trouble people who naw trouble yuh, 'cause di woman nuh want yuh back!

BEENIE DISAPPOINTS STING FANS

How Beenie fi do this to Portmore people who nuh have no money fi go all over the place fi watch him perform? The way Beenie ah tell the story, is like Laing ah bad him up fi do Sting and him just nah do it this year because Laing nah deal wid him wid nuh respect; we undastand that. But, the man ah campaign hard say him nah do Sting, him go all of the free show dem, FAME inna Portmore and perform, him go Stone Love go talk it like him a try wreck Sting, but Beenie fi undastand say dancehall bigger than just him. Him ah the girls dem sugar same way, but him fi humble more while.

( L - R ) Bounty Killer, Munga Honourable

WHO AH THE STING CHICKENS?

Portmore, mi have a new talk fi buss 'cause mi no fraida people. It name 'Sting chickens', and ah just a few people qualify fi dis title, because dem talk a good game but when it come time fi put up or shut up, dem caan mek the mark. Introducing the Sting chickens: D'Angel, Munga, Macka Diamond, Beenie - none ah dem nah do Sting, maybe is a money issue because Laing nah pay dem what dem tink dem worth, but dem and people inna tings and dem nah deh a Sting fi defend it. Spice ah mud up Angel and Macka, Deva ah go give it to Munga, and yu know Bounty is going to class up Fisheenie, so who ah the coward dem? Ah the streets say so, anno me alone.

DEVA BRATT AND MUNGA WAR RECAP

The streets ah say Deva ah the man. Him alone tek on Munga and him entourage ah Stone Love ting, and Portmore, Deva keep on him dark glasses all through the fight. Him get a rahtid lick wid the microphone, Munga fling two more punch, and then Munga rush him again while the man dem a hold Deva, but him swing and miss, and Deva get loose, and clock him wid a right hand, the spit fly inna slow motion on YouTube. Then Munga friend come get in a last lick before the security dem and Billy Slaughter come restore the calm. All weh a gwaan, everybody haffi hold on pon Deva, and Munga force fi draw fi him knife. Mi just glad him neva stab him. Him only shape after him because dancehall no need that right now.

( L - R ) Queen Paula, Deejay Spice

WHO WAS HOT AT STONE LOVE ANNIVERSARY?

Best dressed: The man dem a dress hot, Party Claude, Benny who keep the boat ride, Joe, the White Gadd, inna one $3,500 Versace suit, Dennis and Lee from Black and White. The girls dem hot too, D'Angel look good inna one silver dress, Babsy Grange was hot, and Denise Hunt look good fi the first. Empress did look OK, too. Toya did look rich inna the diamond bra and a Audrey Goodas design.

Worst dressed: Why Renee who de wid Beenie Man now coulden mek the Doctor carry her to a designer? She never ready at all. Ele sleep inna him clothes before him come the show. Mad Michelle never all that either.

QUESTION TIME

❒ Who dem hot new browning ah spar wid Beenie last Saturday? What's going on with the dolly?

❒ How Bounty Killer look so diplomatic inna the new Range Rover? Wonder wha Angel ah say 'bout the new ride?

❒ Talking 'bout new ride, big up Dozer and the convertible Benz. Yu celebrate yuh birthday yesterday. How much earth strong yu gone now?

❒ How Stacious so sexy? Mi see her inna some X-rated outfit de pon the road. No gal no hot like she - 20 fireside.

❒ How Sherine Beauty Hut lose so much weight so fast? Ah coulden Slim Fast ah work so good.

❒ How the promotion pon the T Pain show so weak? It all rescheduled.

❒ When Half Pint ah go drop the album wid Universal Music? The man have a good year, him get proclamation from the city of Hartford Connecticut in August, him get the Keys inna Florida. Bwoy if nuff artiste di humble like Half Pint, dem woulda reach far.

❒ Who is the yute name Rennigod? Him bad like yaws. The lyrics weh say "inna de garrison gun unda mesh marina" connect with the people dem.

❒ How Nesbeth's 'Board house' gwaan so good over the Guinness Sting roadshow over Portmore last weekend?

❒ How Sparkles gwaan so good over Stone Love anniversary? Her song Inna Mi Ting sell off.

❒ Remember last year when Queen Paula say Spice tings big like We Are the World and the whole ah Sting pap up? Wha she ah go say this year? Or is Face time fi rise and dun Paula?

❒ How Munga tek so long fi open him knife pon the stage? Is a rusty three-star ratchet? Mi glad him neva mek Deva have it.

❒ How Guidance ah gwaan so good? Guidance, who advised "love what you got", close the show after MC Nuffy lock off the event at 3 a.m.

❒ How Elephant Man just gone back to him roots so? Him ah par wid Toddler, him voice tune with Killer and the rest of Scare Dem. We love how him a build back.

Email: Sharlenesussu@gmail.com