The three reviewers welcome feedback from the artistes and the public about the column. Send your comments to bussdem@hotmail.com or mail in your songs to 'Mus Buss' at the Gleaner Company, 7 North Street, Kingston. This week the mus' buss/caan buss team will be reviewing Macka Diamond's Best Dressed.

X Factor: "It sound like a part two of Hoola Hoop ... hear she a sing Hoola Hoop deh."

Lady Boo: "Some part sound like dem just give her a riddim and she just a do a ting ... A wonda wha kinda car she drive?"

Witch: "Mi nuh kno but mi neva see her a floss wid a criss car still. Well dem claims say dis tune a fi Angel bout who is best dress, mi nuh hear no words a throw still."

Lady Boo: "Wha she seh bout 'who dat inna best dress war', maybe that's it. Nuting nuh special bout it."

X Factor: "Dat song just deh-deh yah, it just sound like an idle dub ... made up on di spot."

Lady Boo: "Wha yuh seh made up in two minutes."

Witch: "Unnu too wicked, most of her odda song dem nuh all dat creative and thought provoking so dis one jus sound like most of di rest of har songs."

X Factor: "We wicked? look wha yuh haffi seh. Anyways dats why me just nuh believe inna di clashing ting artiste fi siddown and mek propa tune weh mek sense."

Lady Boo: "Anyway, knowing Jamaican people, dem up to any ole tin pan weh knock, so you'll be surprised how far di song reach."

X Factor: "Well a true cause Jamaicans love di passa passa and di mix up once di tune a throw word and di odda artiste respond it a go blow up big."

Witch: "A tru yah, cause di girls weh feel seh dem hot and dem best dress, dem will walk out to it."

Lady Boo: "Dem need fi mix di song again though and put har pon di riddim."

X Factor: "No nuh bodda do nuh more mixing let sleeping dogs lie."

Witch: "Di riddim alrite still, it not great but it have a disco remix feel. Well mi give it a half a buss, mi nuh like it but people dem will like it."

X Factor: "Mi nuh tink it can buss unles Angel respond."