One Third - file

Now massive mi nuh know wha fi say bout deh one yah. Niah email mi one story she read bout one third of One Third an we a say wi nuh too believe deh youth yah enuh! Now innah di story, di one whe name Miguel mussi did get rob, and my youth mi sorry fi hear dat. But hear mi now massive, him a say him go check a girl and as soon as him come out a him car, which him haffi mek sure wi know say a one BMW, some gunman tief him wallet, wha him mek sure say wi know did have een $12,000 and some US dollah. Den fi mek tings worse, dem tief him 3 watcheseses dem, which him mek sure mek we know say one was a Movado wha did worth US$750 and two Guess watch wha worth US$500 each, some whole heap ah gold chain, two ring, and one of dem, him mek sure mek wi know did worth $25,000.

Now massive, mi nuh know whe fi start wid deh poppyshow yah! Mi say not even Flavah Flav, Lee Scratch Perry and Kanye West nuh walk up and dung wid so much fandangleseses! Wha mek him a walk roun wid so much money and jewelry? Yuh nuh have yard? A yuh cyar yuh live eenah? Wha mek yuh a walk wid so much watch, chain and ring? A how much time zone deh eenah Jamaica wha mi nuh know bout? Yuh a sidewalk higglah? A whe yuh get money from fi buy nutten? A pon hire purchase? A wha deh gwaan?

Sherlock di Worl Lock, oonu serious bout di bwoy dem who tief di whole heap a bar money pon oonu boat ride? Cause when Kaboom a show mi di vibes say a same way she did go a one show and dem pose as fren when dem a really frenemy, and tief di artiste money! Gary, a true ting mi a talk! Dem deh a gate a collect money and all of a sudden dem missing and di money missing; dem a say how a smaddy dem gih and dem did haffi rush back a town fi go work. Now mi a say, smaddy can deh collect gate money and just hand ovah money and cyan tell a who? Dat nuh sound suspicious? Oonu tief oonu! Mi go sprinkle some oil fi oonu! Tiefing Kingston 13 bwoy dem! Bring back people money! Gary, Shizzle and Nage oonu serious bout di US $1,000 reward money? Come massive, wi need fi conduct one islandwide search and split di money fi buy gas and cassava fi grater like Arawak!

Kevin minus tha Mohawk dawlin, I love yaw and yaaw group and all that dawlin, but I've been noticin that yaw been waaaving yaaw scarf out and about all tha time! I saw yaaw in it at tha paawty at Akbar's tha otha night and I was wonderin if yaaw were chilly; but then I also saw yaaw at Sasha's Sweet 16 paawty with anothaaw scarf wrap up around yaaw neck and chokin yaaaw, like yaaw were starring in Return of (tha) Mummy, and I was saying that maybe yaaw have a cold and yaaw don't want tha Vicks Vapour Rub to air awwf! Dawlin, I don't wanna have to call yaw phone and leave a voicemail dawlin, but it's gettin outta hand. I just hope I won't haawf to saw you in a ski mask, gloves, goggles, ear muffs, snow shoes paawrforming like Olivaaw at Laaawge dawlin! Toodle-doo! Smooches! Cheerio!

D'Angel and Kevin from Voicemail pose for the camera at Weddy Weddy at Stone Love HQ recently. - Nathaniel stewart

Latonya yuh stop do back-up dancing fi Vegas now? Mi nuh know. Mi realise say a ongle Boricia and some odder girlseses mi a see inna him video dem and pon stage.

A wha? Di last video mi see yuh eena a did when oonu do di cameo fi Sean Kingston Take You There video. By di way some ting a gwaan between you and Gyptian? Mi notice say him replace Vegas and deh number ONE pon yuh list now, not to mention say yuh pictuh did have up yuh and him arm in arm, or more like breastseses push up pon him thick-body-chest, den yuh nuh stop rinse him I Can Feel Your Pain song! A wha? Now by di way Boricia, yuh need fi tek off at least five pound. Yuh a get too heavy fi one dancer. Just look pon yuhself from di Loco Amor video compared to now. Yuh and D'Angel need fi exchange diet! She need five crackers and you need fi start drink water! Do some ting babes cause yuh dancing deadly, but too much tings a bounce roun.

Ah wha kinah eediot ting dat di producer did pull off wid one girl wha day yah? Afta yuh meet di girl and talk pure sweet foolishness inna har ears yuh get wha yuh want, yuh start walk and talk bout di gal a sketz! Wha dat fah? From December until couple months ago, yuh nevah know dat? Or a true wifey did start get suspicious and yuh nevah want yuh cash-58-teeth-cow find out and start sing a different song? Some a oonu deserve wha oonu get! Straight jacket and all dese tings!