Yes mi people, mi deh yah. Mi know mi kinda tek long fi sen on di suss dis year, but yu know how it go, tings affi sort out fus. Anyway, mek mi get to it.

Wayne sweetness...? Mi nuh know

Wayne Williams

Mi a get fi undastan seh di ooman dem a sen crazy text dung a STAR seh dem love off Wayne Williams. Di girl dem a seh im sexy and how im lips dem nice an all dese tings. Mi nah really fight yu ting still, but how mi nuh hear nobody a talk bout yu singing? An mi notice seh u nuh stop come pan mi TV come lick off u lips dem like seh u stuck inna di Sahara pan a hot summer day widout u chapstick. Mi see seh u a try go fi di LL Cool J effect, but jus cool offa di sweetboy ting an work pan u voice.

Short leg, short frock

Mi seh massive, mi nearly drop offa mi bed Sunday wen mi tek in my girl deh inna har short frock. Lawd gee! Bwoy, mi nuh know who do di styling, but unnu need fi get some help from Stacy and Clinton fi learn how fi dress people body type. If smaddy leg dem fava cricket stump, di short frock nah go really work still. My girl, yu voice alrite, but yu fi stop mek dem put u inna dem apron looking sittin deh.

Police mi seh

Mi did promise seh me a go be nice da year yah, but if mi nuh talk mi mind, mi a go stifle and dead. Mi have nuff respect fi police, but dem need fi charge di offica fi malicious destruction of mi hearing. Mi see seh u a try still, but God know, mi tink seh u a more of a asset to di force dan to di music industry. Protect and serve - a dat mi seh!

Anthony Di Boss

Anthony Miller

Anthony, mi boss, gwaan do u ting. Nuh stop give it to dem, Some a dem need fi hear di truth. Mi jus love how u diss dem nicely - 'dat was magnificently boring'. Mi notice how some a dem a smile wen dem hear di fus part a yu comment, like it tek dem a while fi realise seh a nuh nuttin good yu a seh.

The hostess wid the mostess

Yendi

Yendi mi see seh u a try, but jus gi wi likkle more spice and personality please. Mi love how Kiki a blaze up di chill room, an mi notice how she mek di ting a family affair. Unnu cute eeh? Oh God.

Anyway people, next week unnu get more. Mi gone!