SLR - Anthony Minott photos

Yes mi people, mi deh yah. Mi did have nuff tings fi tell unnu, but di storm mash mi up a likkle way and set mi back. So mek mi get straight inna it.

Call Di Police!

Mi haffi go way back fi da one yah cause it sweet me bad. Unnu wouldnt know how mi smile wen mi see seh di police lady get vote off. Mi a get fi undatstan seh di police dem did a tek di govament phone, wa mi tax money a pay fah, an a sen in crazy vote fi har. But a nuh dat, mi hear seh di commish affi sen letta a di station dem, fi tell dem fi low di phone dem. An bam! By di nex week , she gone! Woi!

Secrets, Secrets, Secrets

Secret Melodies

Den wha day yah, mi see di likkle bird dem from SLR and mi notice how one a dem a heng on pan di likkle Secret Melodies yute. Mi nuh kno wha really a gwaan deh so still, but it look like di two group dem distracted by sumting cah dem nuh stop assault mi ears hole a week time. Mi nah lie, mi did love SLR, but dem jus get pap dung all of a sudden.

Neeeexxxxxttttt!

Mi seh, a di shortest time mi eva see smaddy spen pan a show. Lawd gee! Tiffany, wha dem bother call u fah? Mi cyaan stop laugh. Mi kno seh u mus glad seh u did get di likkle chance, but really and truly, yu did come in like a likkle fly, by time mi see yu an tun whe mi head likkle, u gone. No feel no way yah mi fren, a so life go.

One day Christian?

Mi haffi mek a likkle speech bout da gospel night deh wha gwaan wa day. Mi notice how di host dem 'holy up' fi di one night inna dem church wear an so, an mi really a wonda wha dat fah. Wha di sense u decent up fi one night an by next week yu inna tight pants and low cut blouse? Mi neva see unnu wear no vintage clothes pan di oldies night, so wha di one day Christian ting fah?

Anyway, mi gone. Cameal big up yu self. Anthony mi fren, nuh stop give it to dem oh so wickedly. Next week!!

Tiffany Thompson