Khalil and host Yendi Phillipps on stage during one of the Digicel Rising Stars shows at the Courtleigh Auditorium in New Kingston. - anthony minott

Whaa gwaan, mi rising stars people? Mi seh, mi nearly tun ova Sunday night when mi tun on mi tv and tek in some people. Lawd have mercy!

NO STAR APPEAL

Mi love how dem fix up di likkle youngster dem still. Dem look good. But it seem like seh some people just cursed. Like dem jus cyaan look good. Mi seh, di people dem coulda bring in rehabilitation team, fly in a crate load a makeup and a trailer load a clothes and some people jus cyaan fix. Mi nuh kno bout unnu, but da one deh nuh have di star appeal at all.

ZEE LETTER IS ZED

From wha day yah mi fi mention dis, but it slip mi every week. Mi nuh undastan a wha kinda message dat wi a sen to di likkle pickney dem? As far as mi know, a Jamaica wi live, so how unnu have my girl deh a talk bout P-R- I- ZEE - E - S? Wha name Zee? Look ya nuh, di letta name 'ZED'. A dat mi kno from primary school an a dat di pickney dem kno. Bout 'ZEE'! Foolishness!! An den unnu talk bout the 'influence of foreign cultures on our youths'.

MAKEOVER DOLLY

By di way, as wi talk bout makeover an so, mi likkle fren come a far way. Mi did a tek in some old pikcha and mi a tell unnu seh, di likkle girl really look good dese days. Dem deh photo deh mek she look like one likkle rugrat whe grow up inna cane piece, but tings a gwaan ya now, so di old time dressing and posing dun wid now.

UNU FI GWEY

It look like seh da group deh neva get di point. Or mi a wonda if dem did get invitation. If yuh get vote offa di show, wha yuh a do a di other show di next day? Yu supposed to deh a yu yard. Mi really a hope seh a di people dem tell unnu fi show up an a nuh unnu decide fi pull a stunt an turn up, all a sign autograph an so.

KILL DEM TONY KILL DEM

Anthony Miller

Mi seh, mi jus love how Anthony nuh stop kill dem a week time! Lawd gee! Mi laugh till mi nearly dead Sunday night. Anyway people, mi gone yah