Dear Putus,

Mi can wait fi see you this Chrismus. Mi know is only ah year since I see and you kiss me but it feel like 10 year.

Mi write fi tell you say me a come December 23 at 1 o'clock, so please come to di airport pon time. You know I don't like stand up and wait outside the airport with them woman de who wear di three pack a weave pan dem head and the winter boot dem that no have no place inna de heat a yaad.

Every time me see dem, mi just imagine how much dem foot stink thru dem foot a sweat so much inna dem boot deh. So baby, please mi a beg you, no mek me wait too long.

Money na run

Other than that, mi just a tell you from now sey if you was a expect anything from me this year, figet it. No money na run and if it wasn't fi the fact say mi haffi come see mama dem, mi nay na buy no ticket fi come a Jamaica mek dutty nayga come rob me.

Every day mi listen de news up ya, dem a talk about some killing a gwaan a Jamaica. A when de people dem down de get so wicked. And now we hear say people a lose dem work, wha dem expect people fi do? Ah now you ah guh see people get rob an' murder dem one annada.

Tings ah get dread up ya so to, y'know. Last week almost everybody ah my workplace lose dem work. De boss say dem no have no money cause dem cyaan get no money fi barrow from dem bank, so dem haffi let nuff people guh.

Wid me now, mi mortgage gone way up, so mi haffi use up mos' ah mi money pay it because me naw lose mi house. Mi use all mi partna draw fi pay down. Mi work too long and hard fi save up fi di house, yet fi come mek some bank come tek it from me. No sah. Mi naw go live inna no basement like me see some people do and den come home and ah boas' like say dem live inna mansion. Plus, when mi file fi you, and you come up, mi want you fi live inna something nice, no no pap-down place.

Suh, dat is why me ah tell you say no expect nutting from me this year. Mi buy some socks and a few little tings ah Wal-Mart de odder day and ah dat people ah get. If dem no like it, den dem can lef' dem cuz me cyaan do no better right ya now. Some ah di place dem ah have some wicked sale, but when mi look inna de bank book and look say maybe next year, tings ah go get worse, mi see say me need to keep ah likkle money fi di storm whe outa road.

Every year mi carry nice tings and people behave like say mi mus carry tings. Not even ah tank you me nuh get, so dis year we will see who is who and what is what.

Mi love, mi no inna no bashment at all. Can't afford it. So all ah dem dance de whe we usually go fi the holiday, you can figet bout dat. We ah stay home and watch TV or movie wha me burn offa di Internet. You have all some place pan di internet whe you can watch the latest movie dem fi free.

Mi hope you buy ah likkle ham, even though me can imagine how dem mussi expensive ya now. But we can at least have a likkle decent Christmus dinner. Everyting down de so damn expensive.

Mi hear say gas price gone down though, so maybe we can full up the tank a di little Suzuki and tek a drive out, mi know you woulda like that.

And it betta dan nutting, cuz tings nuh suh bright this year.

Anyway, mi gone, so you tek care now till when mi come.

Love,

You darling Sheara.

Send comments to shearer39@gmail.com.