What a gwaan massive. Please tell me say oonu week did alright an nuh as stressful as fi mi! Witch, TAE, Mucho Mucho, Kaboom aka Ice Princess, Avah, big up oonuself. Wha yuh say DJ Genius, JB Rum Pool Party this Sunday, Petersfield! Blazin! Today a di pre-Sting party at di Gleaner we say enuh! Ah 7 pm we done, so nuh bodda come dung yah no late night like a all night rave we a do. Spice, di "Rampin Shop" video sell right off! Yuh deal wid it proppa mi nah lie. Irie Lion, Ann Ramsay, All Access Entertainment, Firewheel Sound (Germany), Shekara Morrison (USA), Barrington Davis, DJ Champagne and di ress, bless up! Ress a massive, link me pon hotgalcherry@hotmail.com. Suss time!

QUEEN MI BACKFOOT!

Mi say when di news finally reach me yesterday morning mi nearly pass out when mi done laugh! How di contest queen gone pon gully side a deh wid di gangster now? Fi mek it wuss, dis harbourshark go round deh a hype like she a smaddy who ah occur. Babes mi nuh tink being dis month's gully hype ah nuttin fi boast bout true yuh get two drive inna di man Range Rover. Massive, a lie mi a tell? Pon top a dat, yuh nuh have video fi go promote? Gwaan, ah dat yuh want - gwaan go tun most known gully wear. From long time mi nuh know whe yuh focus deh. Now when people call yuh fi do show or deal wid some ting ah studio and dem quote a price, yuh a say no dat too small. Horse hair teteh, yuh have hit song? Nuh still promotion fi yuh if yuh do dem ting deh? A sign yaw man If yuh get one opportunity fi buss an inna di limelight juss hol' a focus or go siddung yaw man.

Estelle

ESTELLE ENJOYED JAMDUNG

G-Jam massive mi a tell oonu say mi very very vex. Ah when Estelle gone oonu call Kaboom and say she did deh yah fi one month? One whoooolah month an nobaddy nuh say nuttin? Mi a tell yuh, but ah nuh nuttin. Dr Dizzle mi hear say di song wha oonu a produce fi har sell right off! Bless up oonuself and oonu posh-looking place dung deh. I are will be there very soon. Nuh woory, in between Kaboom and Mucho Mucho mi ah go tour Jamaica fi 2009. Lawd! But as mi mention Estelle, ah wha, Sean naw put out no album again? Ah sign yaw man. "The Trinity" ah di final one or wha?

PRIMARY SCHOOL PROSTITUTE?!!

Mi heart grieve double time! Smaddy link me ah say how one particular primary school dung a country have one likkle pickney dung deh who a student by day and prostitute by night! Mi say mi nevah hear dis in all of mi life! Mi grieve! Mi tell dem say mi need likkle more information bout di situation, fi know if ah she waah do it or ah her family ah push har inna it, or wha. Mi nuh hear back nuttin, so mi a wondah ah wha deh gwaan. Massive! Mi come fi find out say di yute tek sick and inna him sickness him tell Japanese say remind him fi tell her di suss so it can come deh week yah. Loeth and beholdeth di yute pass and gone. Condolences to di family, Jah know. Mi a tell yuh say tomorrow nuh promised to nobaddy.

Kerrie-Ann "Kiki" Lewis

RISING HYPE

Ah syringe full ah hype water dem a inject dem contestant yah wid or wha? Now miss, di people dem from Mandeville invite yuh fi come sing bout three song ah dem staff party, an yuh a demand dat deh big money? Di people dem haffi say, nah sah! Not a bit ah dat. Now massive, how nobaddy fi go fork out so much money if ah nuh one stage show, an she nuh have not even one original verse fi har self? Ah wha di backfoot dis man. Mi say ah me dem "artiste" deh fi start call so mi can send dem mi form fi dem fill out! 10 deggeh deggeh Jamaican dollah - no original song; 100 dollah - yuh have original nonsense rhyme; 500 dollah - yuh ah go mark up company and street wall fi promote mi dance plus deejay one song. Yeah, ah so promoter muss start move, straight! Mek some a dem "artiste" yah understand demself and know say dem nuh start arrive yet.

Red Stripe Girls

MI WAAH FI KNOW:

Kiki ah who ah yuh "hot man" yuh a boast bout?

Ah which calendar hotter? Di Wray and Nephew or Magnum one? To me a di same ting mi a look pon; one juss have more woman and different colour. Mi waah smaddy do one concept wha shock me.

Beenie Man

Coco-Mo, how yuh a cope wid being a grandfather? Lookyah massive ah nuh me call Beenie so, ah him previous Shocking Vibes manager.

Ah di Red Stripe party pon Friday, aftah nobaddy nevah get no cork, a cup wi get wi ting inna, so how wi fi win?