Producer Stephen Mcgregor at home in Big Ship studios.

What a gwaan massive? Bwoy mi nuh know whe fi start dis week! Mi mucho muy mucho frass! Mi go ediat party, mi go sell-ff party, mi go empty party, mi go bedrock and pillow jam party (grin)! Woi, mi tiyad. Merry Christmas and happy new year massive! It was a hectic year wid nuff sorrow and joy but yuh done know wi haffi give tanks fi small mercies same time! Anyway, suss time! Link me pon hotgalcherry@hotmail.com.

MI VERY CONCERNED

How in di name of all dat is normal and commonsensical dem promoter deh from Friday night nuh see some ting wrong wid deh party deh wha a strictly alcohol fi free all night? NUTTIN nuh wrong wid dem OBVIOUSLY under-aged pickney deh a come een ah di party an a drink all night?

Inna Jamaica wi nuh check ID? Ah wha? Ah foreign dat cyaan happen. If yuh ah nuh 21 or older yuh get sheg cause even if yuh do get fi squeeze inna di club, yuh cyaan get serve widdout yuh valid ID if yuh underaged.

Dem people yah a Jamaica a live inna luuu. Den fi mek it wuss, ah inna di heights a di holiday. So wha oonu a say to me is dat it alright fi let een di likkle pickney dem as long as dem have dem money and mek dem drink whoooole night den drive go a dem yard? Den if sinting happen everybody come pon TV a bawl because wha mi notice is dat at least 90 per cent ah dem people deh who did come een, did roll up inna one vehicle BEHIND the steering wheel.

Fi prove mi point, every minute di selectah haffi a mek announcement 'bout whoffah moddah deh ah di gate a wait pon dem, so till di man get vex an say no more ediat message. Mi say fi di whole night mi face have one scowling expression wha nobaddy else but King Stit cudda pull off! Ah slackness man. Juss grieve mi spirit so fi put on mi clothes, tink say a one adult event mi ah go and a pure pickney who still a breast-feed ah tep up-tep up pon mi toe. Slackness.

WHA DI BABY GO NAME?

Sometime mi cyan tek mi self! How di gangster fi have him pregnant woman a foreign and all a pose up wid har a baby shower ah tek pictures and all dese tings, and him a have yet anodda stragglaz pon him arm pon di gully side?

Mr Man, yuh cudden ease dung offah di madness till yuh woman ah foreign have pickney? Pregnancy stressful enuh fren; yuh get high blood pressure juss fi sneeze! But if me a did some ah dem whoffah name get call from man like dem deh inna round robin, mi wuddah go back inna studio go find one nexx mix up song, cause celebrity nuh wear one shirt two time.

So wha mi a say is dat some recent gully wear might soon get dash whe aftah di man woman have har pickney an resume duties as sidekick/warden/gladiator/skin/bodyguard/matey-terminator. But apart from dat Miss preggers, mi wish ooni di bess.

DI GENIUS WELL AH RUN DRY?

Stephen babes, mi nuh know wha fi say. Di streets and di producer dem ah say yuh ah annoy dem wid yuh beat dem now. Dem say yuh a recycle yuh old beat dem and do few changes and call it one different name.

At first mi nevah really understand wha dem ah talk bout, but when mi listen to di new riddim, mi realise say ah sample yuh sample di beginning and odder parts of one ah yuh previous riddim dem. Babes, maybe yuh need fi tek a break and chill out likkle bit, 'cause maybe yuh a run yuhself ragged and yuh not even reach 25 yet, so if yuh pop dung before, it ah go sad.

Pon top of dat, dem a cuss say di way yuh mix and compose yuh beat dem, yeh it sound good and 'cause ah dat, yuh dominate di local market; BUT when it fi go international and really buss out inna one crazy way, it nah happen and pon top ah dat yuh totally change the sound of dancehall. Dat mi haffi agree wid.

Yeh music evolve, but some deejay nah go waah come pon board wid dat because ah nuh dat dem used to as dancehall and dem cyaan tek one large deep breath and ride dem extremely fass riddim deh. So wha happen is dat ah di same people who can deal wid dem beats deh, go pon all ah yuh riddim dem. So mi nuh know if yuh slow dung a bit pon every ting and explore some more before yuh release di same riddim again wid a different name.

AND THE LORD SAID: "LET THERE BE SASHA"?

Sasha

Sasha, yuh really gone do gospel now? Yuh name ah nuh "Sexy body Sasha" still den? Ah you talk di tings dem a di concert inna Lucea say when yuh when deh sing di secular song dem nobaddy nevah did a get nuttin from dem, so yuh may as well go gospel and touch smaddy life; but mi nuh know.

Is not like mi nuh believe say yuh likkle conversion or whatsoever it be nuh genuine, ah juss dat mi wonder why deh decision yah nevah come when yuh a ride high pon di success of I'm Still In Love wid Sean Paul and when yuh song when deh blaze wid Turbulence.

If yuh cudda actually, one day, hopefully, maybe, kindah, almost get a buss as one dancehall artiste, yuh wudda still decide fi lef dat an go enter tru di gospel gateway?

Massive, latah! Tek care and one love fi di Christmas, New Year and beyond!