Bounty Killer

Massive what a gwaan? Lucea oonu sell right off wid RDX! Woooi! Pennybling, Dutty Link dancers, Bermuda Kid, Skeptic, Cassandra, Magnum crew, di whole a oonu bless up! Lucea oonu hear mi now, Friday February 27 a di final one dung deh wid KipRich, wi artiste of the month. Mi cyan let out di tings wi have planned an how it ah go hot! Lawd! Next month we a go Negril, so oonu know say oonu need fi be a Lucea! Woi! Swiss, Glenmore R (Canada), Simor S, Anna and the Reid's Pen Crew, Avalanche Sound, Carlene B (Turks & Caicos), Tony G, Marlon S, Matthew S - B big up oonuself! Suss time! Link me pon

hotgalcherry@hotmail.com.

BARBER FAN, DON'T RUN!

Now oonu tell me if some a dem reporter yah have sense or wha! Massive, di odda day one overseas internet radio woman set up one interview wid Addi; everyting stress-free until di woman go boast an chat inna di interview say she ah "Alliance fi life". Mi say Addi vex so till! Di man nearly tell di woman bout har wharahit and whats-it-not. Dem haffi tek whe dem self and di equipment fastah dan how corruption charge get drop inna Jamaica! Mi nuh know whe some ah oonu so-called journalist come from a backfoot. Don't tek side. Di word "unbiased" mean some ting?

STILL NIKKI WIDDOUT DI 'Z'

Nikki Z - file photos

Nikki Z what a ting doh eeh? Dem people deh finally issue ultimatum to your people eeh? Is eider dem lock off or you get let go! Lawd. But nuh say nuttin, yuh strong, yuh will rise again. Yuh juss need fi be more careful nex time, cause yuh ting when deh gwaan good an God know, mi cyaan find one nex word except fi say a did carelessness pon your part fi mek a next bad wud slip after yuh juss come back suspension fi di same ting. Mi nuh know if a tiyadness or carefreeness. Jah know. But mi have high hopes fi yuh, so gwaan hol' it and memba "your attitude determines your altitude". Bless.

CHI CHING MI ScEPTICAL

Chi Ching Ching

Now Chi Ching mi hear yuh come wid one new talk bout "crocodile" and a say a yuh new slang fi di new year. Mr Man! Me an you both know say a when yuh come dungah Santa Cruz las' October ah di STAR Teen Jam and Skeptic from Lucea did deh pon di mic a do one song an mek some talk, yuh hear deh talk deh. So how you come now and a talk bout you mek slang and phrase? Nah sah! It bettah yuh say yuh ah endorse di ting, but nuh tek a man nex' ting and say a fi yuh. Lucea oonu know wha mi a talk bout too don't? Skeptic all have one crocodile design inna it an Kaboom, Japanese and Sala when deh mek joke bout him muss a wuk fi Kingston Beer. So no Chi Ching! Try again nex' year wid one slang bout rat and dog babes.

MI WAAH FI KNOW:

❒ Empress mi nuh mind yuh all dat much; yuh ah grow pon mi like vine. But yuh cyaan stop di bag ah talk bout "my peeeeoplllle"? Lawd man! Ah you name Hitler?

❒ Tifa and Chino really deh? Mi naw say a true or a lie, mi juss a ask!

❒ Ele and Killa, wha oonu at odds ovah?

Elephant Man