Massive what a crazy week! Mi a tell yuh say Lucea sell right off last week Friday night! Mi say di woman dem swarm dung an nearly dagger whe One Third and Kiprich! Lawd have mercy! Di res a people: Tellah, Sophia Squire, DJ Naz, Dutty Link dancers, Skeptic, Cassandra, Bagga, Wayne, memba a told yuh, Club 300 did hot wid oonu. An look here, dem minions deh, if we nuh invite yuh nowhe, yuh cyan come a di ting a come cuss di crowd bout dem ungrateful. Di people dem nevah come out fi come see yuh POINT BLANK, so don't get wi cross. Suss time! Link me pon hotgalcherry@hotmail.com.

PROMOTER/DEFENDER OF THE EARTH/HE MAN

Mi say people, wi have a new superhero pon wi hands! Oonu nuh hear bout him? Mi say people, di man carry out some body slam and cuss out some people warrahit rounah di back-gate, no job nuh lef fi Hulk Hogan and Batman again. Nah sah! Look here man, people a complain seh yuh get likkle bit carried away man, all di people dem did waah do a come een and we are all know say every show yuh go jingbang ago deh bout. But yuh nuh haffi put yuh hand dem pon di people dem; from yuh say no entry widdout di necessary armband ah juss dat yuh mean, yuh nuh haffi go further wid di stuntman routine or badmind people will pree yuh fi years like wha happen wid Luciano.

YES WE CAN!

General B - file photos

What a way General B tek Obama phrase serious? After Kiprich kill dem lyrically fi di second time di man come back inna di paper a say a cause a Alliance crowd deh ah Magnum Follow di Arrow mek di HempHigher lose. Aftah ah nevah Alliance crowd deh a Sting, so how oonu get boo so till all now Ghost cyan resurrect? Hear mi nuh General B, deh one-on-one clash deh naw go happen, so jus move on now man! Have mercy! One smaddy can love shame an disgrace so? Nuh you say oonu do oonu best? So if yuh best cyan mek yuh win, mi nuh know wha more yuh want? Oonu need fi go rebuild deh lost empire deh an team up wid Monster Twins, di nedder twin dem, L.A.Lewis, Chi Ching, and di res a dancehall 'Z-listers'. If yuh ah go be a poppyshow, yuh need fi jus launch out inna full force an mek wi laugh...again. Yes You Can!

DI GLADIATOR ATTACKS!

Bar-Bee

A did me one have a serious problem wid di Centurian/Gladiator outfit wha Barbee did wear a Hype TV awards? Babes, when di Bible say put on di whole armour of God: breastplate and shield and all dese tings, it nevah mean it literally! Mi say people, di woman have on one piece a shoulder shield of flowers, den one next set of 100 flowers pon har hip, when mi step een mi tink dem a film di re-make of "Giganthor" or some ting. Nah sah! One wrong move when she a breeze pass yuh wid deh shoulder armour deh an yuh know say a di las ah yuh neck tring dat! Smaddy cyan talk to har bout har style? Lawd!

MI WAAH FI KNOW:

Macka Diamond

☛ Since Macka say she waah clash a Follow di Arrow nex year, dem cyan line up she an Queen Paula and mek Spice clash dem? Dem evah a call up Spice name when she nuh deh pon show an a talk bout "bring har up" when dem know say she nuh bill fi di show. Deh clash deh mi waah see!

☛ Raga and Mr Magnum, oonu cyan stop ask Kaboom fi hint? When she a tell mi bout di conversation, mi laugh so till. Hear mi nuh, when oonu in the INK wid me an mi people dem, oonu will know. Mi will email oonu di initiation rites. Lol.

Massive latah!