Vybz Kartel

Massive thank di Lord say a Friday again! As soon as Monday come mi start mi countdown; mi juss cyaan bodda wid di weekly stress more time man! But di odda day di whole a wi tek up weself an say wi go watch di new play 'Season Rice'. Mi say it funny yuh fret! All di part wid di granny an har grandson ah get grab whe by di duppy, mi laugh so till mi tink mi nearly have asthma attack. Not to mention di Romeo part. Yuh know say mi really see di smaddy inna green tights a peep from behind di curtain but mi tink a smaddy from backstage a look inna di crowd, only fi realise say a really medieval Romeo wid all feather cap a talk bout "where forth art thou?" an a throw rock pon di woman window! Colleen yuh play sell right off! Mi laugh so till mi nearly urinated maself. Suss time! Link mi pon hotgalcherry@hotmail.com.

DISTURBIN DI PEACE

Mi say people, di mos' disturbin piece a news reach me wha day yah so dat all mi deh a Cuddy'z a try nyam, mi jaw bone cudden lock! Mi come fi understand say one certain deejay baby modda wha have pickney di odda day might did actually gih di bwoy one jacket! Ah nuh me say so, ah one family memba! But dat a nuh di hot part, di actual puppa of di jacket ah one singer! So mi a say nah sah! Cudda nevah!

So di family memba a mek me know say di baby modda nevah rate di deejay from morning cause him did start out bruk, but when him start get likkle shine, she start pree him and sink dung har long finger nail dem inna him and start mek trouble an stalk matey like ah she name FBI agent. People di ongle ting di mad woman nevah do a SAY di actual line: "Officer I'd like to put out an APB on the deejay and his other woman. Report the coordinates to me at 1400 hours." So aftah all dat, di wuckless stalker undah di quiet a gih di bwoy bun an a look fi riches. But di bigga drama are dat di family memba a say di gal an har people dem gih di bwoy one piece of tie, him cyan lef no matta wha kinah drama she put him eenah again an again! Lawd delivah mi!

RUMROY HIGH ON LIFE

Rumroy yuh gone ah lead yah now! See it deh, Daddy Champagne tek yuh up and mek yuh a record song pon him label; mi happy fi yuh, so mi hope yuh mek use a di ting. Now fi all ah oonu who nuh know Rumroy, him a Lee Scratch Perry son who live outta New Kingston behin Quad fi yeeeeeears. Any real party smaddy an business ownah from New Kingston know dem ting deh. When mi say di man jus salt-up an cyan get true inna life, ah dat me mean. Now see it deh, him get di chance fi record song an do music video cause Daddy Champagne see some talent inna him. And oonu are cannot blame di man puppa; everybody live dem own life an mek dem own decision - Rumroy did mek fi him. So gwaan do oonu ting, mi a wait fi see if Rumroy ah go mek use ah dis or wha.

STOP DI HYPE

Ah wha tek Addi an Lisa Hype? Aftah oonu release one song wha clean an fit fi airplay, oonu release half-naked pictuh bout oonu a promote song. Wha di nakedness a promote except nakedness? Addi have him han' a covah Lisa naked breast an private part, an him stan up fully clothed a smirk. Fi wha? Is like oonu deliberately a try mek drama whe it nuh needed. It jus low an classless.

Mi nuh have no problem a big up Addi when him do good, but dem picture deh nevah necessary. Being naked nuh mean say it sexy, an being sexy nuh mean nakedness. Now if people start attack oonu, yuh a come talk bout di song clean and a talk bout whining aka dancing. Well babes, ah nuh dat di pictuh dem suggest, an if people ah go start lash yuh wid dis, yuh gih dem ammunition. Yuh cyan jus mek di song buss cleanly? An by di way, if yuh a call Lisa Hype yuh (Empire) daughter, yuh nuh tink summen wrong fi ah rub dung an pose wid har half-naked body? Oonu need fi decide wha oonu lie, sorry story be, cause people are have it say a from she a go deh high school deh uppa Constant Spring oonu deh.

WHE L.A. LEWIS DEH?

Ah whe L.A. deh? Di white paint pon di wall dem start fade an mi nuh know wha fi tink: if a di recession mek him cut back pon di paint buyin or him still lock up? Mi stress out, mi nuh know wha fi tink! Lawd have mercy!

Massive, mi gone!

LA Lewis - File