Hot coffee, sexy teen and pushy crowds

Star: Ce'Cile, mi see sey yuh love off Jermaine doe, a bare 'Coffee' yuh a call di man from night! Trus mi, di people inna di crowd did a comment bout it. Jermaine, yuh hot suh, hot coffee fi every Sunday night! Di people dem love yuh doe, you and Camaley a get di loudest cheers inna di audience sah, bare 'substance' people a bawl out. One thing doe, yuh need fi perform betta, di voice deh deh but yuh cyaan a scratch yuh head pon TV and a look down when yuh a perform. Mi waan see likkle energy and some hip movement like Dalton fi excite di girls dem.

Rising: Mi nah lie, mi officially deh pon Camaley bandwagon now. She tek di show Sunday night by far. Nekorah was good but she choose some songs weh lack energy. Dalton! Bwoi Dalton, a weh yuh find dem suit deh? Lef dem deh to mi granfadda. Yuh a young bwoy, yuh mus do betta. Yuh a sing Justin Beiber hip Baby tune looking like yuh is 60 years old. No man! Jermaine yuh a di boss same way, but yuh need fi give di people a betta performance.

Star: Rising mi a mek yuh know fi stop harass mi likkle 16-year-old fren yuh hear! Dalton a mi likkle singer, him can dress however him please fi di likkle girls and di older dressing fi di cougars to vote to. All mi know, him did shot dis week, him come back hot, people di a sey him done but he was in his element. When him sing dah Lately song deh mi figet sey him is only 16, him just sound an look mature. Camaley did really surprise wid dat DeMarco song doe, she had a likkle swagger. Dem top five can sing yuh nuh, dem have di voice but unnu need fi choose betta songs.

In The Streets

Star: Bwoy Kimone, dem find di right job fi yuh! Dah road ting deh crack mi up everrrry week. Unnu see di man weh sey ugly people can mek it, look at Ninja Man, woii mi nearly dead wid laugh. A wha, cause Ninja lock up behind bars and cyaan defend himself unnu a tease di man so? An di people dem weh love and hate Anthony each week, unnu funny bad. One woman sey Anthony is ar fren fi life like she know him, sample man.

Rising: Yea, real talk, dem find the right thing fi har because di chill room ting neva did a too work fi har. But when yuh really look at it, is a kinda important feature because di topics weh dem bring to the people in the streets each week can help the contestant dem if dem tek in wah di people dem a seh, although some a dem jus talk foolishness.

Rising Stampede?

Star: How di Rising Star studio crowd so anxious? My God is like a stampede fi get in almost every week. How unnu so eager? Dis week mi swear mi nearly dead when people a push an shove fi get in. Just calm dung, man, an listen to di people a direct unnu. A wah, unnu waah go a di front and get seen pon TV? If unnu waan go on di show den enter nex year.

Rising: What dem need to do is mek dem entrance orderly. If everybody mek one straight line an go in everyting good, but dem jus a push an gwaan like dem a wild animal fi reach inna di auditorium. An when yuh check it out half a dem not even get likkle a di camera light weh dem a run dung. It sad bad! Do betta people.

Rising Nerves

Star: Mi nah tell no lie Rising, dis coming week a di fuss mi suh anxious. Mi cyaan tell who a guh home an who will be in the top three, it tight. But Toni, big up yuhself, dah last song deh a di best mi see yuh sing inna di competition. Rising, who yuh a vote fa fi top three?

Rising: Really an truly mi a go gi Jermaine mi vote enuh because a long time mi a bring him an him a try hard. Him come out as di underdog inna di competition an did a go haad at one point. Mi still have faith inna di singa.

Star: Mek sure unnu come dis Saturday fi see dem at 'Stars on the Rise' concert being held at The Gleaner Company. It a go hottt! Also, I-Octane, Wasp, Khago, beer madness. All unnu haffi do is bring di a copy of all five stars dis week!