Unnu know when me hear di tings dem wah a plague di people dem me haffi open my bungshell because mi no deh yah fi myself alone but we haffi try and cater to the cries of we brothers and sisters.

Not everybody a go like when me talk but from a truths and rights a dat me deh pon and when something a hurt di people dem is like it a haat mi too! Mi a hear from wah day yah seh the radiation machine dung a KPH naa work and naa work fi how long now. Mi get fi understand seh di list of persons waiting on this treatment long from yah so to Afghanistan and no one can say when this machine will be fixed as people continue to die and suffer!

Di ting wah a distress me is that there seems not to be any urgent interest being exhibited to get this machine fixed as many who are in charge a rape di system and and the pockets of patients because dem have links to machine inna dem private practice! Yuh have nuff good doctors who go above and beyond for their patients and will ensure at whatever cost they do their best for them and yuh have another set who just see people as dollar sign and a quick way fi get to di big house wid di pool and the big vehicle and the flossing!

Politician get nuff bad name but anno dem alone corrupt and education and presumed class don't exclude an individual from being nasty and corrupt! Mi a hear bout sum astronomical figures inna di millions an hundreds of thousands fi get the radiation therapy privately weh most people no have! Weh poor people a go find dem deh breed a money deh fi get treatment, so dem can try live likkle longer?! Nuff a dem have dem pickney, dem family and themself fi live fah and not because people no have di money no mean seh dem fi dead like dawg when the system no try put tings in place fi help dem! Di machine NEED fi fix caw people a suffer! Cancer anno sumting weh nobody go walk an pick up like is a prize and just the reality fi have it can be so stressful and daunting much more fi no have di money fi try help save yuh life. Mi swear more time it might not even be the cancer weh mek di people dem deteriorate so fast but the thought of not having the financial backative!

hot dog sale or cake sale

We need fi do sumting as a people whether it mean have a hot dog sale or a cake sale or sumting fi get a new machine or a proforma invoice fi get the machine up and running. How big big KPH weh so many people look up to and swear by, run dung so? Nuff people no know waa gwaan caw dem no sick but when mi hear people a talk and mi assess the story dem, so much people couldn't a tell lie. Dis is not a blame game just a highlight of what needs to be fixed fi the betterment of Jamaicans. Sickness no response fi class, creed nor colour and none a we no know when a sheet a sickness might tek we and we end up at a hospital that is understaffed and unequipped and then we a go seh if mi did know.

Mi see when Haiti did have the earthquake we come together and send dem a whole heap a money and a whole heap a tings. We need fi do the same mongst weself and see if we can pull together and do sumting cause is not everybody have the option fi fly pon private plane and go to farin! Mi talk bout it pon mi radio show pon RJR 94FM wah day and I was flabbergasted by the number of women who called to tell me their pain and cry to mi because dem want a voice long time. Den chu my tears near unnu waa hear me an di woman dem a put dung sum cow bawling pon di phone together...when mi done mi a seh no sah some awareness need fi happen because a nuff people a face it.

We healthcare system need fi revamp, sort out, flush out and people need to start being held accountable. Di doctor dem cyaa jus' a focus pon dem private practice so an a lef di public inna strain. Mi know unnu go school and waa mek unnu money but medicine is or should be about compassion fi the human life first. Cyaa waa collect billions and a collect government money yet dem no deh a di hospital.

Government need fi intervene because people life anno hustle. We need one a these radiation machines in at least every county because mi tink it hard fi sumbody a Westmoreland need treatment and haffi drive all di way come a town fi get it because di list a MoBay too long. By di time dem back an forth an drop inna pothole an go roun corner dat deh stress deh mek matters worse!

A nuff hospital horror stories deh a road and that need fi sort out so people can feel good and comfortable bout di tax weh dem a pay fi dem healthcare. Nuff young people have cancer and all kinda sickness wah me an u cyaa even dream bout lets give them a fighting chance and an opportunity at LIFE.

misskitty@gleanerjm.com