Prapa respek to all a mi Tambareen Fambily an mi Mix Up massive. An bless up to all listeners ova Mix Up Yaad (mixupyaad.com).

No hitching roun ere, straight to di mix up dem:

Jezebel an Delilah inna One

Bwoy oh bwoy, sometime mi doan even know wa fi say di way how some people vile. People unu pree dis:

A bredda deh a Jamaica a hustle an a try fi survive like everybady else. Him meet dis girl an tings staat gwaan good between di two a dem, an dem decide fi sekkle dung. Dem get married an a buil life togeda.

Inna di marriage him staat notice say more while him wife a move X an a luu up di ting certain way an a get distracted wid oda man. Dem argue at times like any oda couple, but dem still hol it an go tru. Eventually dem all have two pickney.

Afta a while di bredda get a bus fi touch up inna di farin an him push out fi Obama lan. Wen him de deh him neva lef out him wife an him two yute dem. Him remain constantly in touch an work haad an sen crazy money go Jamaica fi dem.

Afta a while him manage fi file fi him wife. Di plan was dat she woulda go a farin an layta wen dem set certain tings dem woulda bring up dem two yute. So di wife reach up an him de deh a tek care a har. Him put har inna big house, mek sure har ting tun up wen shi a do road, an all buy big expensive vehicle gi har.

Den come time wen dem decide fi bring up dem two pickney dem. Of course, wen di filing a seal up di US Embassy tell dem say dem haffi do DNA test fi di pickney dem. And lo an behold, it bust out say di pickney dem was not fi di bredda!! Yeah, di wife fling on two helleva jacket pon him!! Di shock mash up di bredda wicked-wicked!! Him couldn't manage it. Him lef him wife.

Him go deh wid a next woman an end up a breed da woman deh too. But tings neva work out between him an di woman. Di whole time him wife nuh stap lyrics him bout she sorry, an how she love only him an how she want him back. Eventually, di bredda goh deh back wid har.

Afta him deh back wid har she staat bun him again. Dis time wid one a him fren dem! Yeah, did fly-bi-night Delilah staat tek har husband fren. She did also have a best fren, a woman, who she always a par wid, an who she tell har bizniz. Har best fren all know say she a bun har husband.

Den har bes fren see dis yute ya weh she really like. Di yute treat har like a queen, an di two a dem staat buil dem ting. But di yute weh har bes fren like tun out fi be a good fren of har bunna man, an by extension staat deh roun har husband more while wen all a di man dem buck up a dance an oda social settings. Di dutty wicked wife get bummy an mussi staat tink seh it is not a good ting dat har bes fren man know har bunna man, an all staat deh roun har husband sometimes. So di ole Jezebel staat tell har bes fren bare lie bout di yute weh she deh wid. She tell lie say him a walk an a talk bout how him nuh want har, an how him just a jump up inna har belly fi a while, an how him soon dash har weh an lef har. She neva stop carry news to har bes fren an di bes fren neva stop pressure di yute wid di susu susu dem to di point weh it jus cause bare problems inna dem relationship, an di yute jus say him cyaan tek it no more an lef di bes fren.

But hear di funny ting, all now di yute neva tell di wife bes fren say a bare lie di wife a tell cause she nuh waan di bes fren a talk to a man who a fren wid har bunna man, an who deh roun har husband weh she a bun. Him say him naa get involve inna fi dem bizniz, an dat if anyting bad goh happen him nuh want nobady a say a because a something him say.

But in di end di dutty, greedy wicked wife still a diss up har husband weh treat har like a queen, di same husband weh tek har back afta him find out say she gi him two jacket, di same husband weh she now a bun wid him fren.

Hear mi man, some nasty, selfish, greedy, wicked people deh inna di world, and some a dem deh very close to yuh - some a dem deh right unda unu nose. Neva get too relaxed, and TRUST NO ONE!!!