In times like these when we wake up a morning time inna we right and sane mind we haffi give God thanks because di dutty tuff! From problem wid government, to problem wid people to problem wid country only di Almighty know how some a we a cope.

Sometimes when we see people inna dem stress and dem mad or a tek tings fi escape reality we cyaa even too judge dem, we just haffi give thanks seh anno we. Jamaica is not di worst place inna di world and truth be told we betta than nuff but mi sure if nuff a di almshouse get clean up growth and progress will follow. Certain tings inna we culture weh we glorify and accept hold we down and hold we back and then the system preach one ting den force yuh fi do a next!

Di system an' di people a fraud! Some happenings of late open we eye more and more but as wid everyting else inna dis country is a nine-day talk an' den it's back to business as usual. We need fi know how fi stay a course, have some stick-to-it-tiveness and hold di orda! To how sum people get licky licky nowadays and will sell out dem birthright fi likkle or nutten, we woulda still inna slavery because God bless di few who will stand up and do di right ting.

All kinda blame a fling

Mi a watch di news and see all kinda blame a fling 'bout di bus man versus the Transport Authority wah day ova di Sunshine City and all now me nuh see nobody a grieve fi di lady weh lose her good-good pickney because a carelessness!

Condolences to the young man's family and friends and I hope God will comfort unnu in this great loss. When the authority instruct yuh fi stop yuh fi stop! I care zero if yuh no think it important or if yuh feel like yuh cyaa bother. If di driver did stop this incident coulda been easily avoided!

Di bad chase dung an' drive round like is a movie with people's lives at stake naa go mek it! The passengers dem inna dese 'driving aircraft' pon di road is also to be held responsible because more while there is nobody to say, 'driva easy nuh' or as a matter a fact get up and come outta di vehicle! If unnu refuse to drive unda certain condition dem will haffi stop! Den di one person who goodly a talk up fi dem rights di whole a di bus start style and class dem an' when di ataclapse happen all yuh a go hear is "if we did know".

When mi listen to some a di comments is like di people dem nuh have no right fi duh dem work an' a lawlessness we a promote. We cyaa jus' a deal wid 'man haffi eat a food' ... man haffi eat a food but not at the expense of the lives of innocent people. Mi blame the authorities too because how a man who owe so much ticket even have a licence fi deh pon di road in di first place?

Dem a sleep pon dem job too! So unnu mean fi seh it tek di lady son fi dead fi realise unnu have a man wid over 80 traffic violation pon di road a drive people? Not good enough! It's a damn shame and disgrace. So all dem ticket deh weh write up weh dem deh? People haffi a ask if di bus belong to smaddy inna authority why dis man had gone undetected fi so long. Corruption in high an' low places a kill we!

If yuh no stop when dem stop yuh, yuh give dem reason to think u a hide sumting. Den again the authority haffi think about the safety of the people on board first and not just fi ketch di driva. Write off the licence plate number, do sum investigation cause u mus see di bus at another time. People life matter more than ticket!

Di system waa fix from top to bottom! Sum people get pressure while others are allowed to do dem own ting and we react after the fact! Anyhow di likkle bwoy neva dead mi sure dah driva deh woulda still be on the streets. We need fi start be proactive instead a reactive. Time hard right now so til yuh haffi a fret all when nutten no wrong because yuh jus' no know when tings a go crash!

As a people we haffi act together and start holding those who we put in power accountable. If we a go mek noise mek it not jus' be fi weself but the betterment of the country an' generations to come.