Mi hear a big woman a talk a ting wah day yah bout wife/woman fi submit to dem husband/man an' be obedient but to how dem thinking deh neva deh near my consciousness it did send a likkle shock wave thru mi body.

As the conversation went on and me a look inna it she really have a point fi true because it is written. Me did haffi go dig it up cause mi neva know seh dem words deh utter but when mi look inna Ephesians 5:22 it seh so fi true. Mi no know if it deh anyweh else inna di Bible and mi naa too look fi no more confirmation but di lady did a mek a valid point. She a seh by right the man fi lead and be the head of the house and due obedience and respect are to be given to him.

He should set the rules and the laws of the household and even when he's wrong the wife should find a "lady-like" way to present her point. Di more di lady a talk a di more nervous mi a get because me a seh to myself dat sound like a sheep an' shepherd behaviour and me no have no say ova my owna life! It sound good pon paper but inna real life I see how it a go problematic especially when yuh deh wid a Jamaican man!

compromise

It is all well an' good fi a man fi lead and direct but first him haffi be a MAN an' not a 'Man-frame'! Mi no have no problem fi treat a man like a king providing him treat me like a queen. Mi no have a problem fi woman tek talk from man as long as di man woulda tek talk from she. In any relationship compromise is a must but it should be something that is reciprocal! Yuh cyaa waa lead my life as a man when your life no inna orda.

Yuh cyaa want a woman fi be obedient to you when yuh unruly, yuh cyaa expect a woman fi respect yuh when yuh disrespectful and uncaring and a man cyaa expect fi get di best when him is not a provider! Mi woulda like fi find di part inna di Bible now weh speak to how a man must treat him woman in order fi access all dem king treatment deh! How mi fi cook fi yuh an' gi yuh di best part a di meat when yuh no know how meat buy? How a man fi waa roll out him loud mouth pon a woman when a she a wuk an' tek care a herself and provide fi she an' her pickney dem? Pastor no get him gown jus' so him haffi wuk fi dat!

The idea of who an' wat is a MAN a cause a crocus bag a problem because some man jus' tink dem entitled to respect and obedience because dem have a penis. Man fi get rating to the space inna di tile dem walk pon. Yuh have some man a road a di real boss and dem no haffi walk an' say a word but just to how him provide fi him family, protect an' respect him woman him get him fawud automatically!

scarce benefits

Dem man deh mek mi all waa tek off mi nail or do dem shorter fi cook fi him an' rub him back because him work hard and earn mi respect. How a woman fi obey a man weh sleep inna bed all day, no wuk no weh and when she hungry is a next man a feed her? I think we have set the standard for our men. It so low that right now good and responsible men a scarce benefits.

Society place so much stress pon woman and wah we fi do, how we fi look and wat we should accept yet we have given our men the right to cheat, be irresponsible and not step up to the plate and rise to the occasion of being a MAN. Father's Day a Sunday and God bless di few who can really be honoured as a father.

Nuff sperm donor deh bout but the dads and daddies are not as many as they should be. Respect and manners to the real boss dem who a provider and leader and if a man demonstrate seh him can lead mi agree fi follow but know seh in order fi be a good leader he must also know how to follow and give a listening ear. We naa go always equal pon every level everytime inna we relationship but respect, love and trust go a far way and if yuh want your partner to put yuh on a pedestal yuh haffi prepare fi do di same. All real MAN an' real WOMAN large up.