Blessings an respek to all Mix Up linky-linky an to me Tambareen Fambily crew. Bless up unu self. As usual is all about di mix up dem ya now:

Propa-Propa Revenge

A woman up ya a Obama Lan work a one supamawkit. Afta a while, she an one a har co-worker staat like off one anoda an staat get inna tings. Pretty soon dem deh, an all a screechie an a shell dung whole heap a sort out all bout inna di people dem supamawkit.

Afta a while dem staat hustle offa di supamawkit. Dem staat tief di people dem tings an goh sell dem back cheap-cheap in di streets. Crazy money did a run an crazy flossing a gwaan. Dem did a live di high life like wow!

Afta several months di bredda get a nex female co-worker fi come een pon di hustling. She was an assistant manager an did have access to some expensive tings weh di regula employees cyaan touch. She staat ginnal up di supamawkit system an a bring di expensive tings dem to di bredda, an den him sell dem an get whole heap more money. Di money mussi sweet him bad-bad cause him staat pay more attention to di assistant manager. An den sure enough, him an di assistant manager staat do di tings dem.

Him original girl weh him staat di hustling wid find out say him an di assistant manager a dagga an move to him. At first him deny it, but den him come out plain wid it an say yes him an har a deal. Him original girl get bex an tell him say him fi stop diss har dem way deh an dat him fi stop talk to di assistant manager. Yooooowwwwww!!! Di man get bringle an staat wile up him original girl. Him done har wicked. An wen him a done har him mek she know say is not like she can do anyting bout it an goh double-cross him in anyway, cause she did a tief just as much as him. Him laugh afta har an sing to har say "it's all about bigga moneeeeeeeeyyyyyyy!!!" "It's all about bigga moneeeeeeeyyyy!!".

Di original girl bus a bawl an cut.

Afta a wile di original girl stop deal wid di bredda, an a jus him an di assistant manager a run di hustling an a live di big life.

One day, wen him a run off a sale pon some a di tings dem him jus feel two man come arms him up an tell him say dem a police an dem a arrest him fi stolen goods an a bag a tings. Dem carry him goh station an wen him reach dung deh him see say dem have di assistant manager too. Him an har spen di night inna jail, an di nex day dem get bail an figure out say a mus him original girl goh tell di police weh dem did a do. As di bredda find out him fly goh straight to di police an tell dem say di original girl did a tief too. But him did shock an confuse wen di police puzzlingly ask him a weh him a talk bout, an tell him say a di store manager inform dem bout weh him an di assistant manager did a do.

Soh di bredda den fly outa di station an goh straight to di store manager an tell him say di original girl did a tief too. But him nearly collapse wen di store manager tell him say him mus be careful how him a talk bout him fiancée. Di bredda neva get it, an still a try convince di store manager say is a different girl him a talk. But di manager jus tell him di same ting an a deh soh di bredda realize wa did really a gwaan: AFTA HIM DISS HIM ORIGINAL GIRL, SHE GOH DEH WID DI STORE MANAGER!! She an him all get engaged! Den she get di store manager, har new fiancée, fi goh to di police bout di bredda an di assistant manager.

Wen di bredda fully realise wat a gwaan, him staat ask di store manager fi forgiveness an a ask him fi work wid di police fi drop an decrease some a di charges. Di store manager tell him say him wi do dat ONLY if him fiancée agree.

Soh di bredda go back to him original girl, now di store manager fiancée, an a ask har fi forgiveness.

As him done beg she just staat sing: "It's all about bigga moneeeeeeeeyyyyyyy!!!" "It's all about bigga moneeeeeeeyyyy!!".

Him SHAME!! DWL!! Hell hath no fury like a woman scorned!!

'Tambareen fi Life!!'