Propa big ups to mi Tambareen Fambily an di Mix Up Nation. Bless up unu good-so good-so self.

Straight to di mix up dem:

Smart Wifey

Mix Up Big Up to di woman who find out seh har husban a bun har wid a young catty. Di woman ask har husban bout it an him wile har up an class har up di most way, an tell har say she nuh know weh she a say.

Di woman nuh do nuttin more dan find out who was di young gyal weh har husban did a bun har wid. Because di bunna gyal did licky-licky she was able to move to har an seduce har. Di woman bruk out di bunna gyal wid some shell dung lesbian sort out an mash up har head.

All through dis di bunna gyal neva know seh har big woman lesbian lover who a gi har di tings dem, an a do di tings dem to har - was di wife a di man weh she a tek!

Di woman den set up di bunna gyal fi mek di man do a whole heap a freaky tings secretly record everyting weh him did a do. Di man all deh pon video inna di miggle a sort out a bawl out how di bunna gyal supm tun up an how him wife supm nuh have nuh use.

Afta di wife get all di material weh she need, she jus file fi divorce an use all a di information gainst har husban inna court. She clean him out good-good! Now him deh a road a suffa like heng-pon-nail an him former wife a live some propa-propa high life.

Aaaaayyyy bwoy, di wondas a di mix-up world.

Wrenking Man an Him Muma

Raga, mi deh yah a lissen to u show but di reason why mi write u is cuz mi ave a neighbor weh married to one Trinidadian. A she a tek care a him. She a my age and him 12 years younga. In any case, last year dem go visit im mada a New York an dem did a go pon a boat ride an imdid wah bring di camera so dat dem can tek picta. Im neva wah bring di camera cuz it bulky so im a tell har say she fi bring it. Anyhoo, she say she nah bring it cuz she nuh wah di burden a di weight a di camera. Raga, im now get upset cuz she refuse fi bring it, so im tek di brand new camera an fling it a grung and den punch she inna fi har face. So den di mumma tek on di wife an cuss har out bout ow she mek har son upset an a ruin im vacation! Den Raga, di bwoy now tun roun an tell im wife fi apologise to im madda cuz di wife mek im madda upset! So mi aks ar if she did apologise? She say she did ave to, cuz she neva ave nuh weh fi go and she nuh know nubady a New York. So mi ask har seh why u neva ketch back di plane an go back a u yaad?

Mi feel so bad fi har sometimes wen she tell mi di tings dem weh im do har pon a regula. If dat was me, di amount a dunnins im an im mumma woulda get ...

Soh wait deh, mek mi get dis straight, dis woman a tek care a har husban, dem a goh pon boat ride, him say she fi loggo-loggo wid di big ole camera, she say she nuh waan fi do dat, him fling dung di camera, an den fling big tump inna har face!! Him muma den get upset pon har seh she a upset har son, di son den get upset she a upset him mada, an tell har say she fi apologise!! An she dweet??!!

Nooooooooo sah!! A mus mad she mad bout she goh apologise! Afta nuttin neva wrong if she neva waan fi logo-loggo wid load go a di boat ride. An a neva she choose fi fling dung di camera. An him muma stink an brite too!! Wat a piece a facetiniss!!

Hear mi man, mi a bwoy, mi believe strongly seh a man nuh fi get too involved inna him female relatives love life. But Jah know star, if she was my sista or my cousin da bwoy deh woulda haffi get a serious page. Fi real. Dem tings deh nuh right yow. Him neva have no good reason fi goh tump di woman inna har face. Him go luuu wen him goh deh soh. An him muma need fi balance har ting too, mi cyaan believe she tan deh a see har son tump him wife inna har face fi foolishniss an neva at least tell him say him shouldn't did do dat.

Da bredda deh an him muma a two fallen angel. Dem fi need fi guweh fram ya soh. KMT!!!