Prapa spek up to mi Tambareen Fambily an mi Mix Up an Blenda massive. A straight blessings mi say.

No hitching roun ere. On to di Mix Up:

Family Man Tief

Mi live America and a couple years ago mi did a go tru some tings and mi end up a Jamaica fiole a meds an buil back.Anyway Raga, mi end up deh a Jamaica fi awhile with no return ticket and a dem time deh mi find out who a really mi fren.

So pretty much mi get stuck a Jamaica. Mi did ave a man a Jamaica and mi an im start go thru some stuff and im did desert mi fi di mos part. So mi meet dis yute an im like mi off an ting an a shell dung di money. Dis yute end up buying me a ticket. During di time me an im a par a Jamaica it did unda hush, hush cuz im an mi man know dem one aneda, an mi couldn't mek nuhbady know bout it cuz mi man a system man.

So wen di yute a sen on im affi go tru a relative a mine.Mi nah lie Raga, mi did a start like di yute cuz im did really nice to me and treat me good. All mi deh a im yaad an mi "sista" come visit me an im go store an buy di tings fi mi tek care a miself. Dat did really impress mi cuz nuff man nah do dat. An mi de deh an im all sen di same relative go store go buy underwear fi mi.

So Raga mi lan bak a di States an mi an im did a communicate and ting.So one day mi get a call from someone telling mi seh im an mi relative a move too close. So mi nah pay it nuh mind cuz mi nah tink nutten of it cuz mi an mi relative dem really close (so mi did tink).

Raga, mi keep on a hear more tings, but wen di yute a call mi ,mi nah ask im nutten cuz mi nuh really like foolishness. Anyways, cut long story short, mi fly back a Jamaica fi Xmas. So more ppl start tell mi di tings dem. But by dis time now mi an mi man decide fi work tings out.Di yute now did ave im babymadda an a nex ooman so mi know seh nutten neva did a go come of it, but mi still grateful fi weh im did do fi mi wen mi did in need.

Raga, mi deh a Jamaica now an one night mi stan up a di corna an mi si im car drive past me an go stop a di gate. So mi notice everybody turn roun a look so mi turn an look to. Mi ongle si di relative jump out a di car an run go inna di yaad an im tear go up di road. So everybody say, "see, mi did a tell u." So mi nuh seh nutten.

So di nex day wen mi go a di yaad mi confront ar bout it. All mi know is dat she start get hype pon mi an say to mi say she neva know seh a mi man (she call mi rightful man name) she a tek. Raga nutten nuh .... mi off so!

Raga, all mi know is dat mi grab ar an gi ar some lick!Mi neva beat ar fi di man cuz at dat point mi couldn't care less bout im. Raga, it was di principle a di ting, wi a family, an nuh matta if mi an im neva too serious, she shouldn't go deh so. She just did see seh di man did a shell di tings so tru mi go back home now she tek im.

Mi nuh talk bout weh mi gi ppl but from she likkle bit (mi much olda dan ar) until da incident deh appen she use to get nuff from mi. Dats why mi couldn't undastan why she woulda do dat. So mi get fi undastan seh a so di ting set a Jamaica. Dem 90s and 2000 pickney dem nuh ave nutten bout dem. Survival a di fittest I guess.Up to todeh day mi nuh talk to ar, an cuz a she it kinda bring a likkle separation wid odda relatives, and we use to be so close an dats wat hurt me di most.

Nuh long argument nuh haffi rinse ya soh. If you an har a good-up good-up, close relative like dat, den she shouldn't goh dash out gi a man weh she know yuh did a tek. A red yeye she red yeye! She need some purging.

Mi know say a long time now since da mix-up ya did goh dung, an mi hope everyting peace up ya now. But yuh quite right, a crazy man-tiefing a gwaan a Jamaica! An while di man dem jus as much fi blame, it still startling how so much woman naa ramp fi move to a gyal man, even wen a relative. Di one weh really a run di place a fren a tek fren man. Dat common like wow.

An while some a dem hide an screechy wen dem a tief di man dem, yuh have a nex set weh naa hide. Dem all a loud up di ting wid a regula talk weh dem have: dat a nuh "tek" dem a tek a gyal man, but dat dem a "tek OVA" a gyal man. A crazy tings a gwaan a Jamrock. A mi fi tell yuh di mix-up dem.

Bless up yuh self though an gwaan hol a strength.