Me a tun up all a di respek fi mi Tambareen Fambily an mi Mix Up an linky-linky. Big up unu self as always.

Mix up, mix up, an more mix up. Da one ya buck!

Hot Tun Back Blow

Peeps, da mix up ya a fahwud outa Bridgeport, Connecticut, up ya inna Obama Lan. A bredren an him lady decide fi get married. Guests fram all over attend di wedding, including one a di groom real good friend from Jamaica. Di groom an him bride did plan fi goh pon dem honeymoon one week afta di wedding. However, wen time come fi dem leggo fi di honeymoon, di groom work-place link him an inform him dat him haffi come een to work due to some form a emergency. People! Brace unu self fi weh mi a goh write now. Di groom den tell him fren fram Jamaica fi gwaan pon di honeymoon wid him wife weh him jus married!!! Unu believe dat??!! A real eediat ting di groom do to himself.

Of course, wen di fren goh pon di honeymoon wid him bredren wife him woulda kill har wid some good wuk!! Di man shell dung him bredren wife wicked-wicked!! By di time him fahwud fram di honeymoon him goh to di wife husband an tell him say him nuh ready fi goh back a Jamaica yet, an ask him bredren if him coulda mek him stay inna a room inna him basement. Him bredren look out fi him an tell him say him can stay - not knowing dat him did shell out him wife pon di honeymoon.

Soh of course every time di husband lef him house, him fren de deh a fling sweet wine pon him wife.

bunna man

Den di wife mada goh see har dawta an di bunna man a mall a act all lovey dovey. An because she did already pick up wa a gwaan an did warn har dawta fi stop bun har husband dem way deh, di muma get mad an move to har dawta. Di muma gi di dawta a terrible piece a assen deh!! She sen di dawta a hospital! Den she goh to har son-in-law an tell him say she beat di dawta because she did a bun him. But di muma apparently neva tell him a who har dawta did a bun him wid.

Wen di husband goh hospital goh look fi him wife, she gi him a propa cuss out an hangle him shabby an a tell him say him shouldn't did carry news goh gi har mada - wen a neva him tell di muma what a gwaan.

Anyways, di wife eventually lef hospital an goh home an start right weh she did lef off - she an di bunna man a sort out everyday inna di husband house.

One day di husband come home an see dem likkle pickney inna di bedroom alone. Soh him decide fi screechy goh dung a him bredren room inna di basement fi see wa really a gwaan between him wife an him fren. Him bus open di door an quickly tun on di light - ongle fi see him wife an him fren stark naked an di wife well siddung inna saddle an a gi him fren a propa-propa ride! Di wife an di fren jump off a di bed quick-quick. Same time di fren staat cuss di husband say a eediat ting him gwaan wid wen him jus come buss open di door an tun on di light!! If a laugh a pee-pee up mi self!! - di bredda inna di man house a sort out him wife an a cuss di man inna him owna house say him basically shoulda have mannaz an knock before him enta di room weh di man help him out wid. DWL!!

matta resolve

Afta dis di wife an di bunna man staat deal wid har husband wicked. Di wife den run goh call police. Cut long story short, afta di police dem done hear wat a gwaan dem tell di husband say until di matta resolve inna di courts a him haffi fi leave di house!! Yeah, di husband did haffi leave an goh stay a him sista, while him wife stay inna di house a dash out har sour sop gi di husband fren. Two-twos di wife breed fi di bunna man, an den she jus lef har fully lef har husband an deh right out wid him fren.

Afta a while di wife decide say she a goh set up a ting fi di bunna man get him papers. Soh she get har cousin fi married him an file fi him green card. But before di wife could get fully comfortable shock tek har wen she hear say DI BUNNA MAN BREED DI COUSIN!! Di wife get bex an move to di cousin. But di cousin a bad gyal an staat own up di man fully an a defen har ting. Di wife an di cousin end up inna one piece a prekeh weh all reach out pon di road inna Bridgeport. Den di bunna staat loud up di wife bad-bad. Him style har up wicked. Den him dump har an goh live right out wid di cousin.

Now di wife deh a court a try get di bunna man fi deal wid child support.

See it deh people, karma, karma, karma. What you soweth, that you shall reap. Even though di husband did luu wen him sen him wife pon honeymoon wid him fren, di wife did still wicked, an see di crasses tun back roun pon har an a shell har out.

God naa sleep.

Bless up unu self ... see unu Thursday.