It seems to me that as Jamaicans some people have some concepts and beliefs based on the 'Entitlement Sydrome' wah really a create a big divide and conflict inna di country.

The belief that one set fi wuk like a wukhorse and another set fi come in like human termite and suck the lifeblood outta those who a produce.

The syndrome weh seh yuh fi breed up and multiply cause the Bible seh so yet when di pickney dem born and a dead fi hungry it's everybody else's responsibility to take care of and provide fi dem and dem kids.

The syndrome that says that instead of showing appreciation for the help received, a more pon more fi gwaan.

Mi see wah day yah when Hurricane Sandy ravage di island and the people dem go a di shelter dem fi refuge some a dem gwaan wid a bag a shenanigans.

Who naa cuss 'bout food, a cuss 'bout bed, a cuss 'bout di kinda food, a cuss 'bout baby pampas an' mi naa lie, when mi a listen to some a di complaints, mi haffi wonda to myself, a when shelta become five-star hotel?!

Mi naa seh more amenities cyaa provide at these shelters, but it is also important to note that in the time of crisis it's not about luxury but survival.

How can somebody go to a shelter wid dem two long hand when di advisory dem a gi out tell yuh wah fi walk wid in the event that a person would need to come to di shelter?

But some people refuse to comply and den mek it seem like a di shelter people dem is di problem.

When hurricane a blow yuh naa guh get nuh steak fi dinner and if yuh belly long an' yuh licky licky, yuh naa guh get dah bellyfull a bikkle weh some a look for. It no deh deh.

When some people guh a di shelter dem a galang like seh dem guh fi live!

Yes, one should be fairly comfortable, but it will never be like your home. An' truth be told, some a dem live betta life a di shelter dan dem yaad!

Some a dem who a talk bout food an' a find fault wid wah di people dem prepare, no nyam much betta when dem deh a dem yaad!

Mi cyaa tek how some people love show out an' bring down tings when it can deal wid in a calm civilised way. Even if di food and di accommodations no 100 some people fi learn fi tan pon crooked and cut straight!

People haffi start to be appreciative of what others do for them and even in di midst of disappointment, still be able to show some gratitude.

Then after all the complaining bout food, dis, dat an' tara knows wat, di way some of these shelters are treated and damaged after people leave is a whole other story!

The mess and the destruction is a shame and wah dem fi know is dat if shelter wreck inna one hurricane, it won't be there for them ever again.

Bless di people dem who give thanks and tried to cope in the situation as best as possible.

Life no come pon a platter and when u cyaa do fi yuhself and others a try help out a situation that 'entitlement syndrome' needs to be put aside because really an' truly we are only 'entitled' to what we provide.