Mad blessings to all a mi Tambareen Fambily linky-linky an all a mi Mix-up an Blenda massive. An big up all Ragashanti in di Mawnin listeners up ya inna Obama Lan.

Straight to di mix-up dem as usual:

Artiste Drama

Raga, mi favourite artiste come inna town recently come perform an me an mi fren dem go tek him in. It wasn't im bes performance cuz wi know im a born entertainer pon stage an im ting always shell. But mi a get fi undastan seh di wife weh im separated from a breed an a certain artiste son name a call. So mi a go excuse im cuz im probly stress.

Anyways, afta di show, me an mi fren dem a drive go home an all a wi drunk an yu know wen ooman drunk dem talk anyting, all secret weh dem neva wah nuhbady fi know. So we start talk bout which artiste wi would a shell dung and so mi share my story bout di popular artiste weh can dance good. Mi tell dem seh to how im can dance mi tink im ting would a shell dung ongle fi find out seh im galang like im a horse wen di ridings tek im and how it turn mi off cuz di ole heap a brayin neva did a wuk fi me.

So mi fren now start tell wi seh ow yu ave a certain artiste now weh love chat up bare tings, come inna wi town. It so appen dat a likkle dutty wine contest did gwan an a she win. Bare in mind though say she white. So afta di party Mr Nasty Mout selector draw fi mi fren an tell ar fi link im a di hotel room. Raga, she seh wen she go inna di room, him tell mi fren fi do di dutty wine fi im cuz it did turn im on ow she dweet a di club. So dem get naked an ting and fuss im tek out xlarge size condom an tell ar lay dung. Him start do him ting an she seh every jook im mek im affi a draw draw up di condom so she ask im if im ave a smaller one. Him seh no a mussi good di condom nuh good cuz a fi im size ...... She seh wen shellings done an im stan up infront a ar she was soooo shocked at the miniature size cuz she tink seh di way im gwan im did a pack. So mi ask ar if it did good even doh it small. She say a di wuss she eva ave but im did a enjoy imself so she jus lay dung deh till im done.

Wat a way yuh jus a rinse out di tings dem bout di artiste dem, a hope a true yuh a talk an yuh naa jus mek up supm. Cause yuh have nuff a unu out deh jus love mek up tings bout di artiste dem.

But me must admit though say a nuff woman sen me mix up wid nuff artiste who a pap dung wen dem a sen on wuk. Me feel say dem man deh need fi know say as artistes dem a goh always ave woman a draw fi dem, but dat nuh mean say dem haffi sort out most a who a draw fi dem. It nuh matta how much of a bedroom bully an a stulla a man is, if him a sort out most a di whole heap a woman who a draw fi him, DEN HIM MUST PAP DUNG WID SOME!! Not because yuh always a see money in front a yuh mean say yuh must always tek it up. An a kid in a candy store who end up a nyam dung di place mus get sick. Mi naa lie, nookie a one a God's best invention. However, as me always say, yuh mus always be able to say NO to di ting yuh love di most. Cause look deh now, because dem a goh haad dem name a call up inna luu.

Dem too focused on being a teacha of many .... while being a master of none.

A hope dem learn though.

Do road.