December 11, 2012
Big ups to all a mi Tambareen Fambily an all a mi Mix Up massive. An di usual respek to all a mi listeners of Ragashanti in di Mawnin pon Link Up Radio, New York City.
A yute meet a shell dung catty an di two a dem hit it off an decide fi goh pon a date. While him an di B deh a one restaurant she get up an say she a goh bathroom. Dat was di last him see har. Di gyal disappear!! She jus leggo di place an doan even mek di yute know seh she a cut.
Him meet two more girls afta dat an di relationship dem neva work. Den him meet yet anoda girl who also run weh lef him pon a date too!
Now, him a wonda why nuh woman nuh waan stay roun him. Me nuh know him like dat soh me couldn't create no thoughts about him personality. An di likkle time him roun mi him mout neva stink. Soh me really nuh know a wa mek woman a run weh fram him soh. An di ting weh wosara strange is that wen most women a prematurely end a date dem always dweet inna a way fi mek di man carry dem home early. Dem nuh jus run weh soh. So di fact dat whola two women goh pon date wid him an jus git up an run weh fram him like dem a run fi dem life, an doan even say dee nor doe to him, is evidence say dere is someting unbearably painful bout him. Is like him get spray wid di nookie repellant. Him really need fi check himself an figure out da problem deh, or else woman might all staat beat out crasses outa him.
Crazy wid Balls
A bredda weh play football professionally have two football a him yaad.
Several times him come home come find him girlfriend a siddung inna dem bathtub, stark naked, wid di two big ole football dem unda har!!
People unu Eva hear anyting strange soh?
Him ask har why she do dem tings deh an she say she jus dweet fi keep him memory strang wen him gaan.
Soh a gyal man goh pon di road fi a day, an she miss him so much dat she goh siddung inna empty bathtub stark naked wid di man two football dem unda har??!!
Is a mad gyal dat!!
Probably she jus want some bigga balls fi play wid. DWL!! If a laugh mi bruk mi lef rib!!
Jah know star ... some real madeeks out deh a wear skirts yow!! Yuh jus haffi fraid a weh dem wi do yuh inna yuh sleep. KMT!!
Anyways, see unu Thursday same place ya soh. Bless up unu self.
An di ting weh wosara strange is that
wen most woman a prematurely end a
date dem always dweet inna a way fi
mek di man carry dem home early.