Home - The Star
January 10, 2013
Star Features


 

Wickedniss Increase!

Woooooiiiiiiieeeeeee!!!!! A how me happy soh?? Blessings jus a flood me soh!! Me haffi jus a rinse non-stop tanks fi all a di blessings weh a reach me. Mi will neva lef out mi Jamaica, NEVA!!! ‹ but me naa lie, Obama Lan really gree wid me. Di ting tun up till yi buck up ya. An mi loikee eeeet!! Indeed. Wen yuh live good an tek care a people, good will falla yuh. Me cyaan help everybody, but me always do weh me can do. An me is a firm believer in di mantra dat wen yuh help people yuh nuh fi run goh tell everybady, cause if smaddy help you yuh wouldn't want dem a tell everybady. So mi nuh quick fi announce di good weh mi do, but mi feel strongly say a cause me help people di blessings come back roun an claat me. Indeed.

Halakashamaloo!! Mi feel good yuh see. Lol Mix-up time

Wickedniss Increase!

A bredda an him woman a gwaan good up ya inna di New York City (NYC) area. Di yute is a man weh do him ting inna di hustling area. Unu know weh me mean, right? Him sell weh him tink him need fi sell. Him gi him woman anyting she waan. She get brand new hot SUV, house, name brand clothes, an him all send har goh a school. She finish school an get big job an money staat roll een fi har.

She always a tell him say she want him fi leave dem type a hustling deh but she neva one day refuse weh she get fram it. An she always a tell everybody say nuh matta wa happen to dem she will always stan by him side, cause him really did de deh fi har through several years. She mek everybody know say unda no circumstances would she eva give up pon him.

Anyways a likkle ting reach di yute where di authorities almost lock him weh fi a long time. Some drama goh dung an wen presha reach some oda man dem staat call name an a soh certain tings almost done him. Di situation cause him fi medz a new pree pon di hustling an di close call weh him did have. A soh him decide say him a goh leggo dem ting deh an try fi lock a 9 to 5. Him tell him girl say him a goh leggo an she say if him stop di hustling she a goh work an support him fully.

Soh di yute leggo an him girl staat work an a hol it wid him. But afta only two months she staat tell har fren dem bout how him change, an how him naa move like a real man again. A nex top man weh did involve inna dem same tings deh too an rinse out him money inna several restaurants staat pree har an she staat tek him tings. Den three months nuh past since har man stop hustle an she staat bun him wid di restaurant top man. Di top man all buy har a brand new range an she tell har man lie say she get fi buy it through a programme a har work place.

Wen har fren dem keep on a ask har why she a bun har good-good man weh nuh do har nuttin bad an who fi years did always a hol it wid har, she still keep on a offer har ginal excuse bout di yute change an now naa move like a real man anymore.

Eventually, one a har fren goh back goh tell di yute. Den before yuh know it har fren an di yute staat sort out! An afta a while story come to bump an it bust out say di yute an har fren a sort out. Di gyal get bex an staat galang bad how di yute an har fren a wicked!! She staat do dem bad an a say she cyaan believe say people coulda soh wicked!!

But a she a di wicked!!

Of course, har fren did a luu wen she end up goh tek har man, cause it raise di suspicion say di fren did a pree har man long time. An even though har man find out say she did a bun him wid di restaurant man, probably him shouldn't goh bun har wid har fren. But a she a di wickedest one outa all a dem!! How she fi do dat to di man afta him hol it wid har so long??!!

It goes to show dat yuh really cannot falla people mout wen dem a chat bout dem appreciate all weh yuh do fi dem, an how dem will always stan by yuh nuh matta wa. Cause wen tings get difficult or circumstances jus change a little, dem same one wi fling yuh a bush in order jus fi get likes.

Nuh care weh yuh do fi people, an nuh care how much sweet talk dem a gi yuh, trus no one 100 per cent!!!!!

See unu Tuesday same place ya soh. Bless.

It goes to show dat yuh really cannot falla people mout wen dem a chat bout dem appreciate all weh yuh do fi dem, an how dem will always stan by yuh nuh matta wa. Cause wen tings get difficult or circumstances jus change a little, dem same one wi fling yuh a bush in order jus fi get likes.

Bookmark and Share
Home | Gleaner Blogs | Gleaner Online | Go-Jamaica | Go-Local | Feedback | Disclaimer | Advertisement | Privacy Policy | Contact Us