A chat dem a chat, yap dem a yap!! Latty Goodaz a action pak!! Tell dem anyting a anyting!!!!! Fi rise gainst Latty is a heavy sin!!! Di year just start and already some people heart a hurt dem!! Latty Goodaz just a cut and go thru cuz dem a watch me but me nah watch dem!! Memba fi send in unuh suss to lattygoodaz@hotmail.com.

Whopping score of ZERO

Mi a watch Schools Challenge Quiz wha day ya and when mi look mi see York Castle High School done di match pon a whopping score of ZERO. Den you mean fi tell me say after unuh train fi so much months, dem charter bus load fi carry unuh come a town and mi sure say dem gi unuh lunch, unuh really cudda only done wid ZERO??? Mi nah really bash unuh enuh, cause me know it nuh easy, but mi shame fi unuh still. Mi nah tell unuh no lie!!! How unuh a go show unuh face a school??

Chronixx a shell dung di place

Before me lef, mi haffi big-up di boss Chronixx. Every song di man sing a shell dung di place and every show a keep dem book him. How some a unuh feel??? Some a unuh did feel say a unuh a run di place and Chronixx just come run round unuh. Unuh a hype up unuh self and a puff up unuh chest and di man drop three song and di whole place shell dung. A better some a unuh really go siddung inna di bus back and wait fi buss back!!

Kartel Twitter page active

Kartel Twitter page active again and di whole place inna uproar. Di worl' boss co-author take over him page and a talk a bag a tings say Kartel did fi go farin go perform couple days before dem arrest him. Girl Boss, aka Milk, take up di story and a say whoever a manage Kartel page need fi tweet like Kartel, and stop lame up di ting!! OH!! AHOE!!

Entertainer banned from Portmore

Mi just get a email say a popular entertainer is banned from certain sections inna Portmore. A who dem a talk?? Wha really a gwaan over Portmore??? People if unuh have the suss just link Latty Goodaz, cause me really want to know a which entertainer get di Portmore people dem cross!!

Bunny Wailer bun a fire pon Snoop Lion

Bunny Wailer, aka Haile Selassie I right hand, a bun a fire pon Snoop Dogg, aka Snoop Lion. Lava ground and ashes pon all imposter. Mi hear seh Bunny Wailer say Snoop Lion is an imposter Rasta and say Snoop Lion has failed to meet contractual moral and verbal commitments. Unuh stop right deh so!!!!! After mi never know say you haffi go thru all a dem sinting deh just fi say you a Rasta. But look how much people a walk round and a bawl out dem throat hole wid Jah Jah name and mi sure say dem nuh have no contractual agreement. So who in charge a dis Rasta contract?? A who a run di programme?? Mi need fi know wha really a gwaan!!

Cliff-Twang child support drama

Nobody canna cross it!!! Ongle Cliff-Twang alone can cross it!!! Di money whe LIME gi him when dem sign him canna cross it!! The money from the 'song' dem whe him do canna cross it!!! So since Cliff-Twang bank book never cross it, dem just fling him inna jail!! Dem arrest Cliff-Twang fi non-payment a child support!! Wha u do wid yu money Cliff-Twang??? Did yu spend it on studio time or wha??? It look like yu need fi go down a TVJ fi anedda interview so yu can make a next song.